കർണാടകയിൽ ദലിത് നേതാവിനെ പട്ടാപ്പകൽ വെട്ടിക്കൊന്നു

ബംഗളൂരു: കർണാടകയിലെ തുമകുരു ജില്ലയിൽ ദലിത് സംഘർഷ് സമിതി (ഡി.എസ്.എസ്) നേതാവിനെ പട്ടാപ്പകൽ വെട്ടിക്കൊന്നു. നരസിംഹമൂർത്തി എന്ന കുരി മൂർത്തിയാണ് കൊല്ലപ്പെട്ടത്. തുമകുരുവിലെ ഗുബ്ബി ഗ്രാമത്തിൽ ഗവ. ജൂനിയർ കോളജിന് സമീപത്തെ ചായക്കടക്ക് മുമ്പിൽ ബുധനാഴ്ച പകലാണ് സംഭവം. ആയുധധാരികളെത്തി ആക്രമിച്ച് കൊലപ്പെടുത്തുകയായിരുന്നു. പൊലീസ് സംഭവസ്ഥലം സന്ദർശിച്ച് അന്വേഷണം ആരംഭിച്ചു.

കർണാടക ആഭ്യന്തര മന്ത്രി അരഗ ജ്ഞാനേന്ദ്ര മരിച്ച ദലിത് നേതാവിന്റെ ബന്ധുക്കളെ കണ്ട് അനുശോചനം അറിയിച്ചു. അന്വേഷണ ഉദ്യോഗസ്ഥർ പ്രതികളെ എത്രയും വേഗം പിടികൂടുമെന്ന് അദ്ദേഹം ഉറപ്പ് നൽകി.