19 വർഷം പഴക്കമുള്ള കേസിൽ ദലേർ മെഹന്ദിക്ക് രണ്ടുവർഷം തടവ് ശിക്ഷ

പാട്യാല: പ്രശസ്ത ​ഗായകൻ ദലേർ മെഹന്ദിക്ക് രണ്ടുവർഷം തടവുശിക്ഷ. 2003-ലെ മനുഷ്യക്കടത്ത് കേസിലാണ് ഇപ്പോൾ പാട്യാല കോടതി ശിക്ഷ വിധിച്ചിരിക്കുന്നത്. ഗായക സംഘത്തിലെ അം​ഗങ്ങളാണെന്ന വ്യാജേന വിദേശത്തേക്ക് ആളുകളെ അ‍യക്കാൻ പണം കൈപ്പറ്റിയെന്നാണ് കേസ്. ഇതോടെ ദലേർ മെഹന്ദിയെ പൊലീസ് കസ്റ്റഡിയിൽ എടുത്തു.

ശിക്ഷ നടപ്പാക്കരുതെന്ന ​ഗായകന്റെ അപ്പീൽ തള്ളിയാണ് കോടതി ഉത്തരവ്. 2018-ൽ ജുഡീഷ്യൽ മജിസ്‌ട്രേറ്റ് കോടതി രണ്ട് വർഷത്തെ തടവ് ശിക്ഷ വിധിച്ചിരുന്നു.

1998, 1999 വർഷങ്ങളിൽ ദലേർ മെഹന്ദിയും സഹോദരൻ ഷംഷേർ മെഹന്ദി സിങ്ങും ചേർന്ന് ട്രൂപ്പുകളെ അമേരിക്കയിലേക്ക് കൊണ്ടുപോയിരുന്നു. ഈ സമയം 10 പേരെ ഗ്രൂപ്പ് അംഗങ്ങളായി കാണിച്ച് കുടിയേറാൻ സഹായിക്കുകയായിരുന്നുവെന്ന് പട്യാല സദർ പൊലീസ് സ്റ്റേഷനിൽ കേസ് രജിസ്റ്റർ ചെയ്യുകയായിരുന്നു. മെഹന്ദി സഹോദരങ്ങൾക്കെതിരെ റിപ്പോർട്ടുകൾ പ്രകാരം 35 പരാതി കൂടി ഉണ്ടായി.