ഡി.കെ. ശിവകുമാറിന്‍റെ മകൾ വിവാഹിതയായി; വരൻ ബി.ജെ.പി നേതാവ്​ എസ്​.എം.​ കൃഷ്​ണയുടെ പേരക്കുട്ടി

ബംഗളൂരു: കോൺഗ്രസ് നേതാവ് ഡി.കെ ശിവകുമാറിന്‍റെ മകൾ ഐശ്വര്യ വിവാഹിതയായി. കഫേ കോഫി ഡേ സ്ഥാപകൻ പരേതനായ വി.ജി. സിദ്ധാർത്ഥയുടെ മകനും ബി.ജെ.പി നേതാവ് എസ്.എം. കൃഷ്ണയുടെ പേരക്കുട്ടിയുമായ അമർത്യ ഹെഗ്‌ഡെയാണ്​ വരൻ. ഞായറാഴ്ച രാവിലെ ബംഗളൂരുവിലാണ്​ വിവാഹ ചടങ്ങ്​ നടന്നത്​.

ശിവകുമാറിന്‍റെ ഗ്ലോബല്‍ അക്കാദമി ഓഫ് എഞ്ചിനീയറിങ്ങിന്‍റെ ഭരണച്ചുമതല നിര്‍വഹിക്കുകയാണ് എഞ്ചിനീയറിങ് ബിരുദധാരിയും 23കാരിയുമായ ഐശ്വര്യ. അമേരിക്കയില്‍ ഉപരിപഠനം പൂര്‍ത്തിയാക്കിയ അമര്‍ത്യ പിതാവ്​ സിദ്ധാർഥയുടെ മരണശേഷം ബിസിനസ് നടത്തുകയാണ്. കര്‍ണാടക മുന്‍ മുഖ്യമന്ത്രിയായ എസ്​.എം കൃഷ്ണയുമായി അദ്ദേഹം പാർട്ടിയിലുള്ള കാലത്ത്​ തുടങ്ങിയ സുഹൃദ്​ബന്ധം, കൃഷ്​ണ ബി.ജെ.പിയിൽ ചേർന്ന ശേഷവും ഡി.കെ മുറിയാതെ സൂക്ഷിച്ചിരുന്നു. കൃഷ്ണയുടെ മരുമകൻ സിദ്ധാര്‍ത്ഥയുമായും ശിവകുമാറിന് അടുത്ത ബന്ധമുണ്ടായിരുന്നു.

2018 ജൂലൈ 31ന്​ സിദ്ധാര്‍ത്ഥ ആത്മഹത്യ ചെയ്യുന്നതിന്​ മുമ്പ്​ തന്നെ ഇരുവരുടെയും വിവാഹം നടത്താൻ തീരുമാനിച്ചിരുന്നു. എന്നാൽ, അപ്രതീക്ഷിതമായുണ്ടായ വിയോഗത്തെ തുടർന്ന്​ വിവാഹം നീട്ടിവെക്കുകയായിരുന്നു.