ക്രിമിനലിനെ കൊന്നു, അയാളെ സഹായിച്ചവരെ അറസ്​റ്റ്​ ചെയ്യാത്തതെന്ത്​? -പ്രിയങ്ക

ന്യൂഡൽഹി: കുപ്രസിദ്ധ ഗുണ്ടാതലവൻ വികാസ്​ ദുബെയെ ഏറ്റുമുട്ടലിനിടെ വെടിവെച്ചുകൊന്ന സംഭവത്തിൽ പ്രതികരണവുമായി എ.ഐ.സി.സി ജനറൽ സെക്രട്ടറി പ്രിയങ്ക ഗാന്ധി. ‘ക്രിമിനൽ കൊല്ലപ്പെട്ടിരിക്കുന്നു, എന്നാൽ, അയാളെ സഹായിച്ചവരുടെ കാര്യത്തിൽ എന്തു നടപടിയാ​ണെടുത്തത്​​? -പ്രിയങ്ക ട്വീറ്റ്​​ ചെയ്​തു. ജൂലൈ മൂന്നിന്​ കാൺപൂരിനടുത്ത ബിക്രു വില്ലേജിൽ​ ദുബെയുടെ സംഘം കൊല ചെയ്​തത്​ ഒരു ഡി.സി.പി അടക്കം എട്ടു പൊലീസുകാരെയാണ്​. അമ്പതിൽപരം ക്രിമിനൽ കേസുകളിൽ പ്രതിയായ ദുബെയെ പ്ര​ാദേശിക രാഷ്​ട്രീയ നേതാക്കളും ഭരണകക്ഷിയിലെ ഉന്നതരുമാണ്​ സംരക്ഷിച്ചുനിർത്തിയതെന്ന ആ​േരാപണം ശക്​തമാണ്​. 

പൊലീസുകാരെ കൊലപ്പെടുത്തിയതിന്​ പിന്നാലെ ഒളിവിൽ പോയ ദുബെയെ കഴിഞ്ഞ ദിവസം​ മധ്യപ്രദേശിലെ ഉ​ജ്ജയിനിലെ ക്ഷേത്രപരിസരത്തുനിന്നാണ്​  പൊലീസ്​ അറസ്​റ്റ്​ ചെയ്​തത്​. ദുബെയുമായി സഞ്ചരിച്ച പൊലീസ്​ വാഹനം അപകടത്തിൽപ്പെട്ടതിനിടെ ഇയാൾ രക്ഷപ്പെടാൻ ശ്രമം നടത്തിയെന്നും തുടർന്ന്​ പൊലീസ്​ അദ്ദേഹത്തെ വെടിവെച്ചുവെന്നുമാണ്​ റിപ്പോർട്ട്​​. 

‘കാൺപൂർ കൂട്ടക്കൊലയിൽ ജാഗ്രതയോടെ പ്രവർത്തിക്കുന്നതിൽ ഉത്തർ പ്രദേശ്​ പൊലീസ്​ സമ്പൂർണമായി പരാജയപ്പെട്ടിരിക്കുന്നു. മുന്നറിയിപ്പുകളുണ്ടായിട്ടും ഗുണ്ടാത്തലവൻ ഉജ്ജയിനിലെത്തിയത്​ സുരക്ഷാ വീഴ്​ചയുടെയും ഗൂഢാലോചനയു​െടയും ഫലമായാണ്​.’ -പ്രിയങ്ക കഴിഞ്ഞ ദിവസം ട്വീറ്റ്​ ചെയ്​തത്​ ഇങ്ങനെ.