ഝാർഖണ്ഡിൽ സി.പി.എം സംസ്ഥാന കമ്മിറ്റി അംഗത്തെ വെടിവച്ച്‌ കൊന്നു

റാഞ്ചി: ഝാർഖണ്ഡിൽ സി.പി.എം സംസ്ഥാന കമ്മിറ്റി അംഗത്തെ വെടിവച്ച്‌ കൊന്നു. ദലിത് ശോഷൺ മുക്തി മഞ്ച് നേതാവ് കൂടിയായ സുഭാഷ് മുണ്ടയാണ് (36) മരിച്ചത്. ഇന്നലെ രാത്രി റാഞ്ചി ദലദല്ലിയിലെ ഓഫിസിൽ കയറിയാണ്‌ അക്രമികൾ വെടിയുതിർത്തത്. ബൈക്കിലെത്തിയ അക്രമികളാണ് വെടിയുതിർത്തതെന്ന് പൊലീസ് പറഞ്ഞു.

സുഭാഷ് മുണ്ടയുടെ മൃതദേഹവുമായി ദലദല്ലിയിലെ പ്രധാന റോഡിൽ ജനം പ്രതിഷേധിച്ചു. കൊലപാതകത്തിൽ പ്രതിഷേധിച്ച് വിവിധ സംഘടനകളുടെ നേതൃത്വത്തിൽ വ്യാഴാഴ്ച റാഞ്ചിയിൽ ബന്ദിന് ആഹ്വാനം ചെയ്‌തു.