കോവിഡ്​ രോഗികളോടുള്ള പെരുമാറ്റം മൃഗങ്ങളോടുള്ളതിനേക്കാൾ മോശം -സുപ്രീംകോടതി

ന്യൂഡൽഹി: കോവിഡ്​ രോഗികളോട്​ മൃഗങ്ങളോടുള്ളതിനേക്കാൾ മോശമായ പെരുമാറ്റമാണെന്ന്​ സുപ്രീംകോടതി. കോവിഡ് രോഗികളുടെ മൃതദേഹം കൈകാര്യം ചെയ്യുന്നതിലുള്ള അനാദരവ് ഉള്‍പ്പടെയുള്ള വിഷയങ്ങളില്‍ സ്വമേധയാ എടുത്ത കേസ് പരിഗണിക്കവേ ആണ് സുപ്രീം കോടതിയുടെ പരാമര്‍ശം.

‘കോവിഡ്​ രോഗികളെ മൃഗങ്ങളേക്കാൾ മോശമായി കൈകാര്യം ചെയ്യുന്നു. ഒരു കേസിൽ മൃതദേഹം അഴുക്കുചാലിൽ നിന്ന്​ കണ്ടെത്തി. രോഗികൾ മരിച്ചുവീഴു​േമ്പാഴും അവരെ തിരിഞ്ഞുനോക്കാൻ പോലും ആരുമില്ല’ -സുപ്രീംകോടതി രൂക്ഷമായി പ്രതികരിച്ചു. 

കോവിഡ്​ രോഗികളെ ചികിത്സിക്കുന്ന ഡൽഹിയിലെ സർക്കാർ ആശുപത്രികളുടെ സ്​ഥിതി ദയനീയമാണെന്ന്​ കോടതി നിരീക്ഷിച്ചു. ഡൽഹിയിൽ കോവിഡ്​ പരിശോധനയുടെ കുറവ്​ സംബന്ധിച്ച വിശദീകരണം നൽകാൻ അരവിന്ദ്​ കെജ്​രിവാൾ സർക്കാരിനോട്​ ആവശ്യപ്പെട്ടു. 

കോവിഡ്​ പരിശോധനകളുടെ എണ്ണം ഡൽഹിയിൽ കുറവായ​ത്​ എന്തുകൊണ്ടാണെന്ന്​ സുപ്രീംകോടതി ചോദിച്ചു. ‘ചെന്നൈയിലും മുംബൈയിലും പരിശോധനകളുടെ എണ്ണം 16,000 മുതൽ 17,000 വരെയായി ഉയർത്തു​േമ്പാഴും എന്തുകൊണ്ടാണ്​ ഡൽഹിയിൽ ഒരുദിവസത്തെ പരിശോധനയുടെ എണ്ണം 7,000 മുതൽ 5,000 വരെയായി കുറയുന്നത്​?’ -ജസ്റ്റിസുമാരായ അശോക് ഭൂഷണ്‍, സഞ്ജയ് കിഷന്‍ കൗള്‍, എം.ആര്‍.ഷാ എന്നിവര്‍ അടങ്ങിയ സുപ്രീം കോടതി ബെഞ്ച് ആരാഞ്ഞു.

സർക്കാർ ആശുപത്രികളിൽ കോവിഡ്​ ബാധിച്ച്​ മരിച്ചവരുടെ മൃതദേഹങ്ങളോട്​ വളരെ അനാദരവോടെയാണ്​ പെരുമാറുന്നത്​. ചില സമയങ്ങളിൽ മരണവിവരം ബന്ധുക്ക​െള അറിയിക്കാൻ പോലും തയാറാകുന്നില്ല. സർക്കാർ ആപ്പിൽ ആശുപത്രികളിൽ കിടക്ക ഒഴിവ്​ കാണിക്കു​േമ്പാഴും ചില ആശുപത്രികൾ എന്തുകൊണ്ടാണ്​ രോഗികളെ പ്രവേശിപ്പിക്കാത്തതെന്നും സുപ്രീംകോടതി ചോദിച്ചു. 

രാജ്യത്ത്​ കോവിഡ്​ രോഗികളുടെ എണ്ണത്തിൽ മൂന്നാമതാണ്​ ഡൽഹി. മഹാരാഷ്​ട്രയിലും തമിഴ്​നാട്ടിലുമാണ്​ ഏറ്റവും ​കൂടുതൽ രോഗബാധിതർ. ഡൽഹിയിൽ 34,687 പേർക്കാണ്​ ഇതു​വരെ കോവിഡ്​ ബാധിച്ചത്​. 1,085 മരണം സ്​ഥിരീകരിച്ചു.