ലോക്​ഡൗൺ 5: കർശന നിയന്ത്രണങ്ങൾ 13 നഗരങ്ങളിൽ ; ഹോട്ടലുകളും മാളുകളും തുറന്നേക്കും

ന്യൂഡൽഹി: ലോക്​ഡൗണി​​​െൻറ അഞ്ചാംഘട്ട മാർനിർദേശങ്ങളെ കുറിച്ചുള്ള ആദ്യ സൂചനകൾ പുറത്ത്​. അഞ്ചാം ഘട്ടത്തിൽ രാജ്യത്ത്​ മുഴുവൻ ലോക്​ഡൗൺ ഏർപ്പെടുത്തില്ലെന്നാണ്​ ഇ​ക്കണോമിക്​ ടൈംസ്​ റിപ്പോർട്ട്​ ചെയ്യുന്നത്​. 70 ശതമാനം രോഗികളുമുള്ള 13 നഗരങ്ങളിൽ മാത്രമായി ലോക്​ഡൗൺ പരിമിതപ്പെടുത്തുമെന്നാണ്​ സൂചന. മറ്റ്​ മേഖലകളിൽ പരമാവധി ഇളവുകൾ നൽകിയാവും ലോക്​ഡൗൺ നടപ്പാക്കുക.

ലോക്​ഡൗണി​​​െൻറ അഞ്ചാം ഘട്ടത്തിൽ ഹോട്ടലുകളും മാളുകളും തുറക്കുമെന്നും റിപ്പോർട്ടുകളുണ്ട്​. ഞായറാഴ്​ച നടക്കുന്ന പ്രധാനമന്ത്രിയുടെ മൻ കീ ബാത്തിലായിരിക്കും ഇതുമായി ബന്ധപ്പെട്ട കൂടുതൽ വിവരങ്ങൾ പ്രഖ്യാപിക്കുക. 

ലോക്​ഡൗണിൽ ഇളവ്​ അനുവദിക്കു​മെങ്കിലും സംസ്ഥാനങ്ങൾക്ക്​ വേണമെങ്കിൽ നിയന്ത്രണങ്ങൾ കടുപ്പിക്കാം. സാമൂഹിക അകലം പാലിച്ചുകൊണ്ട്​ കൂടുതൽ പൊതുഗതാഗതം ആരംഭിക്കും. മെട്രോ സർവീസിന്​ അനുമതി നൽകാൻ സാധ്യതയില്ലെന്നും കേന്ദ്രസർക്കാർ ഉദ്യോഗസ്ഥൻ പ്രതികരിച്ചു.