ഇന്ത്യയിൽ പ്രതിദിന കോവിഡ്​ മരണം 5000 കടക്കുമെന്ന്​ പഠനം

ന്യൂഡൽഹി: ഇന്ത്യയിലെ പ്രതിദിന കോവിഡ്​ മരണം 5000 കടക്കുമെന്ന്​ പഠനം. മെയ്​ പകുതിയോടെ പ്രതിദിന മരണം 5000ത്തിലെത്തുമെന്നാണ്​ അമേരിക്കയിൽ നടത്തിയ പഠനത്തിൽ വ്യക്​തമാക്കുന്നത്​. ഏപ്രിൽ മുതൽ ആഗസ്റ്റ്​ വരെയുള്ള കാലയളവിൽ മൂന്ന്​ ലക്ഷത്തോ​ളം പേർക്ക്​ ജീവൻ നഷ്​ടമാകുമെന്നും പഠനത്തിൽ പറയുന്നു.

'കോവിഡ്​ 19 പ്രൊജക്ഷൻസ്​' എന്ന പേരിൽ വാഷിങ്​ടൺ യൂനിവേഴ്​സിറ്റിയിലെ ഹെൽത്ത്​ മെട്രിക്​സ്​ ആൻഡ്​ ഇവാലുവേഷനാണ്​ പഠനം നടത്തിയത്​. ഈ വർഷം ഏപ്രിൽ 15നായിരുന്നു പഠനഫലം പുറത്ത്​ വിട്ടത്​. ഇന്ത്യയിലെ കോവിഡിന്‍റെ രണ്ടാം തരംഗത്തെ തടയാൻ വാക്​സിനേഷന്​ കഴിയുമെന്നും പഠനത്തിൽ പറയുന്നുണ്ട്​​.

വരുന്ന ആഴ്ചകളിൽ കോവിഡ്​ ഇന്ത്യയിൽ കൂടുതൽ രൂക്ഷമാകുമെന്നും യൂനിവേഴ്​സിറ്റി മു​ന്നറിയിപ്പ്​ നൽകുന്നുണ്ട്​. ജൂലൈ അവസാനത്തോടെ ഇന്ത്യയിലെ കോവിഡ്​ മരണം ആറ്​ ലക്ഷം കടക്കുമെന്നും റിപ്പോർട്ടുണ്ട്​.