രാജ്യത്ത്​ കോവിഡ്​ മരണം ആറായി; രോഗബാധിതർ 341

മുംബൈ: രാജ്യത്ത് കോവിഡ് ബാധിച്ച് രണ്ട്​ പേർ കൂടി മരിച്ചു. മഹാരാഷ്ട്രയിൽ ചികിത്സയിലായിരുന്ന 63 കാരനും ബീഹാറിലെ 38കാരനുമാണ്​ മരിച്ചത്​. ഇതോടെ ഇന്ത്യയിൽ കോവിഡ് ബാധിച്ച് ആകെ മരണം ആറായി.

ശനിയാഴ്​ചയാണ്​ 63കാരനെ മുംബൈയിലെ സ്വകാര്യ ആശുപത്രിയിൽ പ്രവേശിപ്പിച്ചത്​. ഇയാൾ ​നേരത്തേ പ്രമേഹം, ഉയർന്ന രക്തസമ്മർദ്ദം, ഹൃദ്രോഗം എന്നിവക്ക്​ ചികിത്സ തേടിയിരുന്നു.

മഹാരാഷ്ട്രയിൽ 74 കോവിഡ് കേസുകളാണ് സ്ഥിരീകരിച്ചത്. ഞായറാഴ്ച ഇതുവരെ 10 കേസുകൾ സ്ഥിരീകരിച്ചു. രാജ്യത്ത് ഏറ്റവും കൂടുതൽ പേർക്ക് കോവിഡ് ബാധിച്ചത് ഇവിടെയാണ്.

രാജ്യത്ത്​ കോവിഡ്​ ബാധിതരുടെ എണ്ണം 300 കടന്നതോടെ പ്രതിരോധ പ്രവർത്തനങ്ങൾ ഊർജ്ജിതമാക്കിയിട്ടുണ്ട്​. പ്രധാനമന്ത്രി നരേന്ദ്ര മോദി ആഹ്വാനം ചെയ്ത ജനത കർഫ്യൂ ആരംഭിച്ചിരിക്കുകയാണ്.