രാജ്യത്ത്​ കോവിഡ്​ 19 ബാധിതർ 170 ആയി

ന്യൂഡൽഹി: രാജ്യത്ത്​ കോവിഡ്​ ബാധിതരുടെ എണ്ണം 170 ആയി. മഹാരാഷ്​ട്രയിലാണ്​ കോവിഡ്​ 19 കൂടുതലും റിപ്പോർട്ട്​ ചെയ്​തത്​. മൂന്ന്​ വിദേശ പൗരൻമാർക്ക്​ ഉൾപ്പെടെ 47 പേർക്കാണ്​ മഹാരാഷ്​ട്രയിൽ കോവിഡ്​ സ്ഥിരീകരിച്ചത്. ചണ്ഡിഗഢിൽ ആദ്യ കോവിഡ്​ 19 റിപ്പോർട്ട്​ ചെയ്​തു. 23 വയസുള്ള യുവതിക്കാണ്​ രോഗം സ്ഥിരീകരിച്ചത്​. ഇവർ അടുത്തിടെ ഇംഗ്ലണ്ടിൽ നിന്ന് മടങ്ങിയെത്തിയതാണ്​. ചണ്ഡിഗഢ്​ സെക്ടർ 21 ൽ താമസിക്കുന്ന യുവതിക്ക്​ മാർച്ച് 15നാണ് രോഗലക്ഷണം അനുഭവപ്പെട്ടത്​. യുവതി സെക്ടർ 32ലെ സർക്കാർ മെഡിക്കൽ കോളജ്​ ആശുപത്രിയിൽ ചികിത്സയിലാണ്​.

ആന്ധ്രയിൽ വ്യാഴാഴ്​ച ഒരാൾക്കു കൂടി കോവിഡ്​ സ്ഥിരീകരിച്ചിട്ടുണ്ട്​. നേരത്തേ ഇവിടെ ആദ്യ കോവിഡ്​ റിപ്പോർട്ട്​ ചെയ്​തിരുന്നു. ജമ്മുകശ്മീരിൽ തീർഥാടകർക്കും ഭക്തർക്കും മതസ്ഥലങ്ങളിൽ ഒത്തുചേരുന്നതിന് ദേശീയ ദുരന്ത നിവാരണ നിയമം 2005 പ്രകാരം സർക്കാർ നിയന്ത്രണങ്ങൾ ഏർപ്പെടുത്തിയിരിക്കുകയാണ്​. കശ്​മീരിൽ ബുധനാഴ്​ച ആദ്യ കോവിഡ്​ 19 സ്ഥിരീകരണം നടന്നിരുന്നു. ശ്രീനഗറിലായിരുന്നു രോഗം സ്ഥിരീകരിച്ചത്​. ശ്രീനഗർ മുൻസിപ്പൽ കോർപറേഷൻ മേയർ ജുനൈദ്​ അസിം മട്ടുവാണ്​ ഇക്കാര്യം ട്വീറ്റ്​ ചെയ്​തത്​.

കർണാടകയിലും ഡൽഹിയിലും മഹാരാഷ്​ട്രയിലുമായി മൂന്ന്​ പേരാണ്​ രാജ്യത്ത്​ കോവിഡ്​ 19 ബാധിച്ച്​ മരിച്ചത്​. മുൻകരുതൽ നടപടിയുടെ ഭാഗമായി ഉത്തർപ്രദേശ്​, രാജസ്ഥാൻ ഉൾപ്പെടെയുള്ള ചില സംസ്ഥാനങ്ങളിൽ സെക്ഷൻ 144 പ്രകാരം നിരോധനാജ്ഞ പ്രഖ്യാപിച്ചിരിക്കുകയാണ്​.