ഒമിക്രോണിന്​ ഡെൽറ്റയേക്കാളും തീവ്രത കുറവായിരിക്കുമെന്ന്​ പഠനം

ന്യൂഡൽഹി: കോവിഡിന്‍റെ ​ഡെൽറ്റ വകഭേദത്തേക്കാൾ തീവ്രത കുറവായിരിക്കും ഒമിക്രോണിനെന്ന്​ ആരോഗ്യവിദഗ്​ധർ. പല രോഗികൾക്കും പനി പോലും ഉണ്ടായില്ലെന്ന്​ ​ഡൽഹിയിലെ ഫോർട്ടിസ്​ ആശുപത്രിയിലെ ഡോക്ടറായ ഡോ.മനോജ്​ ശർമ്മ പറഞ്ഞു. ഒമിക്രോൺ രോഗികളെ ചികിത്സിച്ച രണ്ട്​ ഡോക്ടർമാരാണ്​ ഇതുസംബന്ധിച്ച പ്രതികരണം നടത്തിയത്​.

ഡെൽറ്റയേക്കാളും തീവ്രത കുറവായിരിക്കും ഒമിക്രോണിന്​. ജലദോഷം മാത്രമാണ്​ പല രോഗികൾക്കും അനുഭവപ്പെട്ടത്​. പലർക്കും പനി പോലും ഉണ്ടായിരുന്നില്ല. എങ്കിലും ഒമിക്രോൺ ലക്ഷണങ്ങളെ കുറിച്ച്​ ഇപ്പോൾ നിഗമനങ്ങളിലെത്താനാവില്ലെന്ന്​ അദ്ദേഹം പറഞ്ഞു. നിലവിലുള്ള വിവരങ്ങളനുസരിച്ച്​ ഒമിക്രോൺ തീവ്രമാകില്ലെന്നാണ്​ സൂചന. എന്നാൽ, പ്രായമായവരിൽ രോഗം പടർന്നാൽ മാത്രമേ ഇതിന്‍റെ തീവ്രത സംബന്ധിച്ച്​ കൂടുതൽ നിഗമനങ്ങളിലേക്ക്​ എത്താനാവു.

ഒമിക്രോൺ രോഗികൾക്ക്​ പനിയുണ്ടെങ്കിൽ പാരസെറ്റാമോൾ ടാബ്​ലെറ്റ്​ മാത്രമാണ്​ നൽകുന്നത്​. ഇതുവരെ 34 ഒമിക്രോൺ രോഗികളെ ചികിത്സിച്ചിട്ടുണ്ട്​. അതിൽ ഭൂരിക്ഷം പേർക്കും രോഗലക്ഷണങ്ങൾ ഉണ്ടായിരുന്നില്ല. ഒരാൾക്ക്​ മാത്രം ചെറിയ രീതിയിൽ പനിയുണ്ടായിരുന്നു. ഒരാൾക്ക്​ ശരീരവേദനയുണ്ടായിരുന്നു. മറ്റുള്ളവർക്കെല്ലം ജലദോഷത്തിന്‍റെ ലക്ഷണങ്ങൾ മാത്രമായിരുന്നുവെന്ന്​ എൽ.എൻ.ജി.പി ആശുപത്രി മെഡിക്കൽ ഡയറക്ടർ ഡോ.സുരേഷ്​ കുമാർ പറഞ്ഞു.

അതേസമയം, ഒമിക്രോണിനെതിരെ ജാഗ്രത പുലർത്തണമെന്ന്​ സംസ്ഥാനങ്ങളോട്​ കേന്ദ്രസർക്കാർ കഴിഞ്ഞ ദിവസം നിർദേശിച്ചിരുന്നു. ആവശ്യമെങ്കിൽ രാത്രി കർഫ്യു ഏർപ്പെടുത്തണമെന്നും ​നിർദേശിച്ചിരുന്നു. ലോകരോഗ്യസംഘടനയും ഒമിക്രോണിനെതിരെ മുന്നറിയിപ്പുമായി രംഗത്തെത്തിയിരുന്നു.