യു.പിയിൽ സാമ്പിളെടുക്കാതെ കോവിഡ്​ പോസിറ്റീവെന്ന്​ പരിശോധന ഫലം; അന്വേഷണത്തിന്​ ഉത്തരവ്​

ലഖ്​നോ: യു.പിയിൽ സാമ്പിൾ ശേഖരിക്കാതെ തന്നെ കോവിഡ്​ പോസിറ്റീവെന്ന പരിശോധന ഫലം നൽകിയ സംഭവത്തിൽ അന്വേഷണത്തിന്​ ഉത്തരവ്​. ബലിയ ജില്ലയിലാണ്​ സാമ്പിളെടുക്കാതെ തന്നെ കോവിഡ്​ പരിശോധന ഫലം നൽകിയത്​.

ജില്ലാ മജിസ്​ട്രേറ്റിനും മെഡിക്കൽ ഓഫീസറിനും ലഭിച്ച പരാതിയുടെ അടിസ്ഥാനത്തിലാണ്​ നടപടി. ഹർപൂർ സ്വദേശിയായ രാഘവേന്ദ്ര കുമാർ മിശ്രയെന്നയാളാണ്​ പരാതി നൽകിയത്​. രാഘവേന്ദ്രയുടെ സഹോദരൻ ബ്രിജേന്ദ്ര മിശ്രക്ക്​ ഏപ്രിൽ 18ന്​ കോവിഡ്​ പരിശോധന നടത്തിയിരുന്നു. ​ ഇയാൾക്ക്​ ഏപ്രിൽ 20ന്​ രോഗം സ്ഥിരീകരിച്ചു.

ഏപ്രിൽ 20ന്​ തന്നെ ആരോഗ്യപ്രവർത്തകരെത്തി മറ്റ്​ കുടുംബാംഗങ്ങളുടെ സാമ്പിളുകൾ ശേഖരിച്ച്​ പരിശോധിച്ചു. പരിശോധനയിൽ രാഘവേന്ദ്രയുടെ മാതാവിനും പിതാവിനും രോഗം സ്ഥിരീകരിച്ചു​. എന്നാൽ, സാമ്പിളെടുക്കുന്ന സമയത്ത്​ വീട്ടിലില്ലാതിരുന്ന രണ്ട്​ ബന്ധുക്കൾ കോവിഡ്​ പോസിറ്റീവാണെന്ന്​ ആരോഗ്യപ്രവർത്തകർ അറിയിക്കുകയായിരുന്നുവെന്ന്​ രാഘവേന്ദ്ര ആരോപിക്കുന്നു. ഇവരുടെ സാമ്പിൾ പോലും ശേഖരിക്കാതെയായിരുന്നു പരിശോധനഫലം നൽകിയത്​.