മഹാരാഷ്​ട്രയിൽ പിടിവിട്ട്​ കോവിഡ്​; സൈന്യം നിയന്ത്രണം ഏറ്റെടുക്കുമെന്ന വാർത്ത തള്ളി മുഖ്യമന്ത്രി

മുംബൈ: മഹാരാഷ്​ട്രയിൽ കോവിഡ്​ 19 വൈറസ്​ ബാധ രൂക്ഷമായി തുടരുന്നു. വെള്ളിയാഴ്​ചത്തെ കണക്കുകൾ കൂടി പുറത്ത്​ വന്നതോടെ സംസ്ഥാനത്തെ വൈറസ്​ ബാധിതരുടെ എണ്ണം 19,063 ആയി. 1,089 പുതിയ കേസുകളാണ്​ റിപ്പോർട്ട്​ ചെയ്​തത്​. ഇതിൽ 784 എണ്ണവും മുംബൈയിലാണ്​. 

സംസ്ഥാനത്ത്​ 731 പേരാണ്​ കോവിഡ്​ ബാധിച്ച്​ മരിച്ചത്​. ഇതിൽ 31 മരണവും മുംബൈയിലാണ്​. അതേസമയം, കോവിഡ്​ പടർന്നു പിടിക്കുന്നതിനിടെ മുംബൈയുടെ നിയന്ത്രണം സൈന്യം ഏറ്റെടുക്കുമെന്ന റിപ്പോർട്ടുകൾ തള്ളി മുഖ്യമന്ത്രി ഉദ്ധവ്​ താക്കറെ രംഗത്തെത്തി. 24 മണിക്കൂർ ജോലി ചെയ്യുന്ന പൊലീസുകാർക്ക്​ വിശ്രമം ലഭിക്കാനായി കേന്ദ്രസർക്കാറിൽ നിന്ന്​ കൂടുതൽ ​ജീവനക്കാരെ ആവശ്യപ്പെടും. ഇതിന്​ മുംബൈയുടെ നിയന്ത്രണം സൈന്യത്തിന്​ കൈമാറുമെന്ന്​ അർഥമില്ലെന്നും അദ്ദേഹം വ്യക്​തമാക്കി.

അതേസമയം, മഹാരാഷ്​ട്രയിൽ കോവിഡിൻെറ ചങ്ങല മുറിക്കാൻ ഇതുവരെ സാധിച്ചിട്ടില്ലെന്ന്​ ഉദ്ധവ്​ താക്കറെ സമ്മതിച്ചു. ലോക്​ഡൗൺ എല്ലാ കാലത്തും തുടരാനാവില്ല. ഒരു ദിവസം അതിൽ നിന്ന്​ പുറത്ത്​ വന്നേ മതിയാകു. ശാരീരിക അകലം പാലിച്ചും ഫേസ്​മാസ്​ക്​ ഉപയോഗിച്ചും മാത്രമേ ഈ പ്രതിസന്ധിയെ മറികടക്കാനാവുവെന്നും അദ്ദേഹം പറഞ്ഞു.