കോവിഡ്​ ബാധിച്ച മാതാപിതാക്കളുടെ കുഞ്ഞിനെ ഏറ്റെടുത്ത്​ പൊലീസുകാരി; അഭിനന്ദന പ്രവാഹം

ന്യൂഡൽഹി: രാജ്യം കോവിഡ്​ മഹാമാരിക്കാലം താണ്ടു​േമ്പാൾ മാതൃദിനത്തിൽ ശ്രദ്ധേയയാകുകയാണ്​ ഡൽഹിയിലെ ഒരു പൊലീസുകാരി. കോവിഡ്​ പോസിറ്റീവായ മാതാപിതാക്കളുടെ ആറുമാസം പ്രായമായ കുഞ്ഞിന്​ അമ്മയാകുകയായിരുന്നു​ ഇവർ.

മാതാപിതാക്കൾക്ക്​ കോവിഡ്​ പോസിറ്റീവാകുന്നതോടെ ഒറ്റപ്പെടുന്നവരാണ്​ കുട്ടികൾ. മിക്കവരെയും ബന്ധുക്കൾ ഏറ്റെടുക്കുകയും സംരക്ഷിക്കുകയും ​െചയ്യും. എന്നാൽ ഡൽഹിയിലെ ജി.ടി.ബി നഗർ റേഡിയോ കോളനിയിലെ ദമ്പതികളുടെ ആറുമാസം പ്രായമായ കു​ഞ്ഞിനെ ഏറ്റെടുക്കാൻ ബന്ധുക്കൾക്ക്​ കഴിഞ്ഞില്ല.

ദമ്പതികളുടെ ബന്ധുക്കൾ ഉത്തർപ്രദേശിലാണ്​ താമസം. രണ്ടിടത്തും ലോക്​ഡൗൺ പ്രഖ്യാപിച്ചിരുന്നതിനാൽ ബന്ധുക്കൾക്ക്​ ഡൽഹിയിലെത്തി കുഞ്ഞ​ിനെ ഏറ്റെടുക്കാൻ സാധിക്കാതെ വന്നു. നിരവധി ബന്ധുക്കളുമായി ബന്ധപ്പെ​ട്ടെങ്കിലും ദമ്പതികളുടെ അടുത്തേക്ക്​ എത്തിപ്പെടാൻ കഴിയാത്ത സാഹചര്യമായിരുന്നു എല്ലാവർക്കും.

എന്നാൽ സംഭവം അറിഞ്ഞ സൂറത്തിലെ ഒരു ബന്ധു സമീപത്തെ ​പൊലീസ്​ സ്​റ്റേഷനിലെ ഹെഡ്​കോൺസ്റ്റബ്​ൾ രാഖിയെ ബന്ധപ്പെടുകയായിരുന്നു. ഇതോടെ രാഖി ഉന്നത ഉദ്യോഗസ്​ഥരുമായി ബന്ധപ്പെട്ടു. കൂടാതെ കോവിഡ്​ പോസിറ്റീവായ കുഞ്ഞിന്‍റെ മാതാപിതാക്കളോടും സംസാരിച്ചു.

ഇരുകൂട്ടരുടെയും സമ്മതം ലഭിച്ചതോടെ രാഖി ദമ്പതികളുടെ വീട്ടിലെത്തുകയും കുഞ്ഞിനെ ഏറ്റെടുക്കുകയുമായിരുന്നു. കുഞ്ഞിന്​ ആവശ്യമായ ഭക്ഷണവും മറ്റു സാധനങ്ങളും രാഖി കൈയിൽ കരുതിയിരുന്നു. പിന്നീട്​ യു.പിയിൽ ദമ്പതികളിൽ ഒരാളുടെ മാതാവിന്​ കുഞ്ഞിനെ സുരക്ഷിതമായി കൈമാറുകയായിരുന്നു. സംഭവം പുറത്തറി​ഞ്ഞതോടെ നിരവധിപേരാണ്​ രാഖിക്ക്​ അഭിനന്ദനവുമായെത്തുന്നത്​.