ഹോം ക്വാറൻറൈൻ ലംഘിക്കുന്ന രോഗിക്കും ബന്ധുക്കൾക്കും പിഴ ചുമത്താൻ തീരുമാനം

ചെന്നൈ: ഹോം ക്വാറൻറൈൻ നിയമങ്ങൾ ലംഘിക്കുന്ന കോവിഡ്​ രോഗികൾക്കും ബന്ധുക്കൾക്കും​ പിഴ ചുമത്തുമെന്ന മുന്നറിയിപ്പുമായി ഗ്രേറ്റർ ചെന്നൈ കോർപ്പറേഷൻ​. ബന്ധുക്കൾ വീണ്ടും നിയമം ലംഘിച്ചാൽ അവരെ കോവിഡ് കെയർ സെൻററുകളിലേക്ക് മാറ്റുമെന്ന്​​ ജി‌.സി‌.സി കമ്മീഷണർ ഗഗൻ‌ദീപ് സിംഗ് ബേദി പറഞ്ഞു,

കോവിഡ് -19 പോസിറ്റീവായ രോഗികളും അവരുടെ കുടുംബാംഗങ്ങളും വീടുകളിൽ നിന്ന് പുറത്തുകടക്കുന്നതായി പരാതികൾ ഉയർന്നിട്ടുണ്ട്. ഇത്തരം പ്രവർത്തനങ്ങൾ കൊറോണ വ്യാപനത്തിന്​ കാരണമാകും.

കോവിഡ്​ മാനദണ്ഡങ്ങൾ പാലിക്കാത്തവർക്കെതിരെ നിരീക്ഷിക്കാനും നടപടിയെടുക്കാനും ചെന്നൈ കോർപ്പറേഷൻ ഓരോ മേഖലയ്ക്കും രണ്ട് നിരീക്ഷണ സംഘങ്ങളെ നിയോഗിച്ചിട്ടുണ്ട്. കൊറോണ വൈറസിനെതിരായ സുരക്ഷാ നടപടികൾ പാലിക്കുന്നുണ്ടെന്ന് ഉറപ്പുവരുത്താനായി ഈ സംഘം ഷോപ്പുകൾ നിരീക്ഷിക്കും.

ഇതിനുപുറമെ കോവിഡ്​ 19 രോഗികൾക്ക്​ ഭക്ഷണം, മരുന്നുകൾ, മറ്റ് അവശ്യവസ്തുക്കൾ എന്നിവ നൽകുന്നതിന് 2000 ത്തിലധികം സന്നദ്ധപ്രവർത്തകരെയും ജി.സി.സി നിയോഗിച്ചിട്ടുണ്ട്. അതിനാൽ രോഗികളും ബന്ധുക്കളും പുറത്തിറങ്ങേണ്ട ആവശ്യമില്ലെന്നും ജി.സി.സി വിശദീകരിച്ചു.