ന്യൂയോർക്കിൽ ഇന്ത്യൻ വംശജനായ ജേർണലിസ്​റ്റ്​ കോവിഡ്​ ബാധിച്ച്​ മരിച്ചു

ന്യൂയോർക്ക്​: കോവിഡ്​ ബാധിച്ച്​ ചികിത്സയിലായിരുന്ന ഇന്ത്യൻ-അമേരിക്കൻ മാധ്യമപ്രവർത്തകൻ​ ബ്രഹ്മ്​ കാഞ്ചിഭ ോട്​ല മരിച്ചു. ഇന്ത്യൻ വാർത്താ ഏജൻസിയായ യുനൈറ്റഡ്​ ന്യൂസ്​ ഓഫ്​ ഇന്ത്യക്ക്​ ഉൾപ്പെടെ നിരവധി മാധ്യമങ്ങൾക്ക്​ വേണ്ടി പ്രവർത്തിച്ച വ്യക്തിയാണ്​ ബ്രഹ്മ്​. കോവിഡ്​ ബാധയെ തുടർന്ന്​ ന്യൂയോർക്കിലെ ആശുപത്രിയിൽ ചികിത്സയിലിരിക്കെയാണ്​ മരണം.

മാർച്ച്​ 23 മുതൽ ഇദ്ദേഹത്തിന്​ ​േ​കാവിഡ്​ ലക്ഷണങ്ങൾ ഉണ്ടായിരുന്നു. അഞ്ചു ദിവസത്തിനുള്ളിൽ രോഗം അധികമാവുകയും അദ്ദേഹത്തെ ആശുപത്രിയിൽ പ്രവേശിപ്പിക്കുകയുമായിരുന്നു. ഒമ്പതു ദിവസത്തെ ആശുപത്രി വാസത്തിനൊടുവിൽ തിങ്കളാഴ്​ച അർധരാത്രിയോടെ മരണത്തിന്​ കീഴടങ്ങുകയായിരുന്നു.

66 കാരനായ ബ്രഹ്മ്​ കാഞ്ചിഭോട്​ല 28 വർഷമായി അമേരിക്കയിലാണ്​. 2001 മുതൽ 2006 വരെ യുനൈറ്റഡ്​ ന്യൂസ്​ ഓഫ്​ ഇന്ത്യയുടെ സീനിയർ കറസ്​പോണ്ടൻറ്​ ആയിരുന്നു. 2007 മുതൽ മെർജർ മാർക്കറ്റ്​സ്​ എന്ന സാമ്പത്തികകാര്യ ജേർണലി​​െൻറ കണ്ടൻറ്​ എഡിറ്ററായി ജോലി ചെയ്​തു വരികയായിരുന്നു അദ്ദേഹം.

അമേരിക്കയിലെ ന്യൂജേഴ്​സിയിലും ന്യൂയോർക്കിലും വൈറസ് ബാധ കണ്ടെത്തിയ നിരവധി ഇന്ത്യൻ വംശജർ​ ചികിത്സയിലാണ്​. ന്യൂയോർക്കിൽ 142,384 പേർക്കാണ്​ കോവിഡ്​ സ്ഥിരീകരിച്ചത്​. 122,315 പേർ വിവിധ ആശുപത്രികളിലായി ചികിത്സയിലുണ്ട്​. 5,489 പേർ മരിച്ചു.

ന്യൂജേഴ്​സിയിൽ 44,416 പേർക്ക്​ രോഗം സ്ഥിരീകരിച്ചു. 1232 മരണങ്ങളാണ്​ ഇവിടെ റിപ്പോർട്ട്​ ചെയ്​തത്​.
അമേരിക്കയിൽ ഇതുവരെ 12,854 പേർ കോവിഡ്​ ബാധിച്ച്​ മരിച്ചു. നാലു ലക്ഷത്തിലധികം ​ആളുകൾക്ക്​ കോവിഡ് ​19 സ്ഥിരീകരിച്ചിട്ടുണ്ട്​.