രാജ്യത്ത് സമൂഹ വ്യാപനമെന്ന്​ ആരോഗ്യ വിദഗ്​ധർ

ന്യൂഡൽഹി: രാജ്യത്ത്​ പലയിടങ്ങളിലും കോവിഡ്​ സമൂഹ വ്യാപനം നടന്നുകഴ​ിഞ്ഞെന്ന്​ ആരോഗ്യ വിദഗ്​ധർ. സമൂഹ വ്യാപനമുണ്ടായിട്ടി​ല്ലെന്ന്​ കേന്ദ്ര സർക്കാർ അവകാശപ്പെടുന്നതിനിടെയാണ്​ മറിച്ചുള്ള വിലയിരുത്തലുമായി ആരോഗ്യ വിദഗ്​ധർ രംഗത്തെത്തിയിരിക്കുന്നത്​.

ഇന്ത്യൻ പബ്ലിക്​ ഹെൽത്ത്​ അസോസിയേഷൻ, ഇന്ത്യൻ അസോസിയേഷൻ ഓഫ്​ പ്രിവൻറീവ്​ ആൻഡ്​ ​സോഷ്യൽ മെഡിസിൻ, ഇന്ത്യൻ അസോസിയേഷൻ ഓഫ്​ എപ്പിഡമോളജിസ്​റ്റ്​ എന്നീ സംഘടനകളുടെ സംയുക്ത പ്രസ്​താവനയിലാണ്​ സമൂഹ വ്യാപനം നടന്നതായി പറയ​ുന്നത്​. 

രാജ്യത്ത്​ കോവിഡ്​ പടർന്നു പിടിച്ചതിൽ കേന്ദ്ര സർക്കാറിനെ അവർ കടന്നാക്രമിച്ചു. വിവിധ തരം പകർച്ച വ്യാധികളെ കൈകാര്യം ചെയ്​തതി​​​െൻറ ദീർഘകാല അനുഭവ പരിജ്ഞാനമുള്ളവരുടെ അഭിപ്രായം തേടാതെ സ്വീകരിച്ച തീരുമാനങ്ങൾ തിരിച്ചടിയായെന്നാണ്​ വിലയിരുത്തൽ. 

പകർച്ചവ്യാധി നേരിട്ട്​ കൈകാര്യം ചെയ്യാത്തവരാണ്​ സർക്കാറിന്​ ഉപദേശം നൽകിയത്​. മുന്നൊരുക്കമില്ലാതെയുള്ള സമ്പൂർണ അടച്ചുപൂട്ടൽ തിരിച്ചടിയായെന്നും പ്രസ്​താവനയിൽ പറയുന്നു. ലോക്​ഡൗണിൽ അന്തർ സംസ്ഥാന തൊഴിലാളികളുൾപ്പെടെയുള്ളവർ വിവിധ ഇടങ്ങളിൽ കുടുങ്ങി. ഭക്ഷണവും വെള്ളവുംകിട്ടാതെ കാൽനടയായി നാട്ടിലേക്ക്​ പോയവരിൽ പലരും അപകടങ്ങളിലും മറ്റും മരണ​പ്പെട്ടു. പലരും മാനസിക സമ്മർദ്ദത്തിലേക്കെത്തിയതായും വിദഗ്​ധർ വിലയിരുത്തി.

മുംബൈ, ഡൽഹി ഉൾപ്പെടെയുള്ള സ്ഥലങ്ങളിൽ നിന്ന്​ വിവിധ സംസ്ഥാനങ്ങളിലേക്ക്​ ആളുകളെ എത്തിക്കാൻ കേന്ദ്ര സർക്കാർ തയാറായത്​ രണ്ടാം ഘട്ട ലോക്​ഡൗണിന്​ ​ശേഷമാണ്​. അപ്പോഴേക്കും​ കൂടുതൽ പേരിലേക്ക്​ രോഗം പടരാൻ തുടങ്ങിയിരുന്നു. ഇതോടെ രോഗബാധിതർ വിവിധ സ്ഥലങ്ങളിലേക്ക്​ സഞ്ചരിക്കുന്ന സാഹചര്യമുണ്ടാക്കി. ഇത്​ പല സംസ്ഥാനങ്ങളിലേക്കും ഗ്രാമീണ ​മേഖലകളിലേക്കും രോഗവ്യാപനമുണ്ടാക്കിയെന്നും വിദഗ്​ധർ വിലയിരുത്തി. 

Latest Video: