അഞ്ചുദിവസത്തിനിടെ മഹാമാരി​​ കവർന്നത്​ കോവിഡ്​ പോരാളിയുടെ മൂന്നു പ്രിയപ്പെട്ടവരെ

ന്യൂഡൽഹി: കോവിഡ് പോരാളിയായ പൊലീസുകാരന്​ അഞ്ചുദിവസത്തിനിടെ കോവിഡ്​ മൂലം നഷ്​ടപ്പെട്ടത്​ മൂന്നു കുടുംബാംഗങ്ങളെ. അഹ്​മദാബാദിൽ കോവിഡ്​ പ്രതിരോധ പ്രവർത്തനങ്ങളിൽ ഏർപ്പെട്ടിരുന്ന പൊലീസുകാരനായ ദാവൽ റാവലി​െൻറ മാതാപിതാക്കളും സഹോദരനുമാണ്​ കോവിഡ്​ ബാധിച്ച്​ അഞ്ചുദിവസത്തിനിടെ മരിച്ചത്​.

ദേഹാസ്വാസ്​ഥ്യം അനുഭവപ്പെട്ടതിനെ തുടർന്ന്​ മൂന്നപേരെയും തക്കരനഗറിലെ സ്വകാര്യ ആശു​പത്രിയിൽ പ്രവേശിപ്പിക്കുകയായിരുന്നു. അവിടെവെച്ച്​ മൂന്നുപേർക്കും കോവിഡ്​ സ്​ഥിരീകരിച്ചു. ദിവസങ്ങൾ കഴിഞ്ഞതോടെ മൂന്നുപേരുടെയും ആരോഗ്യ നില വഷളായി. മാതാപിതാക്കളെ സിവിൽ ആശുപത്രിയിലേക്കും സഹോദരനെ മറ്റൊരു സ്വകാര്യ ആശുപത്രിയിലേക്കും മാറ്റി.

നവംബർ 14ന്​ റാവലി​െൻറ മാതാവി​െൻറ മരണം സ്​ഥിരീകരിച്ചു. രണ്ടുദിവസത്തിനു​ള്ളിൽ കൊറോണ വൈറസിനോട്​ പോരാടി പിതാവി​െൻറ ജീവനും നഷ്​ടമായി. പിന്നീട്​ സഹോദരനും മരണത്തിന്​ കീഴടങ്ങുകയായിരുന്നു.

അഹ്​മദാബാദിൽ ആദ്യഘട്ടം മുതൽ കോവിഡ്​ ബാധിതരുടെ എണ്ണം കുതിച്ചുയർന്നിരുന്നു. കഴിഞ്ഞ ദിവസങ്ങളിൽ നഗരത്തിൽ കോവിഡ്​ സ്​ഥിരീകരിക്കുന്നവരുടെ എണ്ണം കുത്തനെ ഉയർന്നിരുന്നു. ഞായറാഴ്​ച 341 പേർക്കാണ്​ അഹമാദാബാദിൽ കോവിഡ്​ സ്​ഥിരീകരിച്ചത്​. അഹ്​മദാബാദിൽ മാത്രം 1968 പേർ കോവിഡ്​ ബാധിച്ച്​ മരിച്ചു.