മതം മാറിയത്​ സ്വന്തം ഇഷ്​ടപ്രകാരം, യുവതി ഹൈക്കോടതിയിൽ

ശ്രീനഗർ: ജമ്മു കശ്​മീരിൽ നിർബന്ധിതമായി തട്ടിക്കൊണ്ടുപോയി മതംമാറ്റിയെന്ന ആരോപണമുയർന്ന സിഖ്​ പെൺകുട്ടികളിലൊരാൾ നിഷേധവുമായി കോടതിയിൽ. ജമ്മു കശ്​മീരിലാണ്​ 18കാരിയായ പെൺകുട്ടി താൻ ഇസ്​ലാം വിശ്വസിച്ചത്​​ ആരുടെയും നിർബന്ധത്തിന്​ വഴങ്ങിയല്ലെന്നും തന്നിഷ്​ടപ്രകാരമാണെന്നും ഹൈക്കോടതിയിൽ സത്യവാങ്​മൂലം സമർപിച്ചത്​. സമപ്രായക്കാരായ രണ്ടു പെൺകുട്ടികൾ ഒന്നിച്ച്​ നാടുവിട്ട സംഭവമാണ്​ കോടതിയിലെത്തിയത്​.

രണ്ടുപേരും ഒന്നിച്ച്​​ നാടുവിടുകയായിരുന്നുവെന്നും മുസ്​ലിം യുവാക്കളെ വിവാഹം ചെയ്​ത്​ സ്വന്തം ഇഷ്​ടപ്രകാരം മതം മാറുകയായിരുന്നുവെന്നും ഹൈകോടതിയിൽ നൽകിയ സത്യവാങ്​മൂലത്തിൽ പറയുന്നു. പ്രായപൂർത്തി എത്തിയതായും എല്ലാ നടപടിക്രമങ്ങളും പൂർത്തിയാക്കിയതായും ഇവർ കോടതിയെ അറിയിച്ചു. സംഭവത്തിൽ വാദംകേട്ട കോടതി പെൺകുട്ടിയെ കുടുംബത്തിന്​ കൈമാറി. പെൺകുട്ടിക്ക്​ സ്വന്തം​ ഇഷ്​ടപ്രകാരം തീരുമാനമെടുക്കാമെന്നും പൊലീസ്​ അടിച്ചേൽപിക്കരുതെന്നും ഇതോടൊപ്പം നിർദേശിച്ചു.

സംഭവത്തിൽ നിർബന്ധിത മതപരിവർത്തന ആരോപണവുമായി സിഖ്​ സംഘടനകൾ സജീവമായി രംഗത്തുവന്നിരുന്നു. പെൺകുട്ടികളിലൊരാൾ വിവാഹം ചെയ്​തത്​ 45 കാരനെയാണെന്നും അയാൾക്ക്​ മൂന്നുകുട്ടികളുണ്ടെന്നും ഓൾ പാർട്ടി സിഖ്​ കോർഡിനേഷൻ കമ്മിറ്റി ചെയർമാൻ ജഗ്​മോഹൻ സിങ്​ പറഞ്ഞു. വിവാഹം അസാധുവാക്കണമെന്നും ആവശ്യപ്പെട്ടു. എന്നാൽ, ഇസ്​ലാമിൽ നിർബന്ധിത മതപരിവർത്തനമില്ലെന്നും സ്വയം ഇഷ്​ടപ്രകാരം തീരുമാനമെടുക്കലാണെന്നും വിഷയത്തിൽ നിഷ്​പക്ഷ അന്വേഷണം വേണമെന്നും ജമ്മു കശ്​മീർ ഗ്രാൻറ്​ മുഫ്​തി നാസിറുൽ ഇസ്​ലാം പറഞ്ഞു.