യു.പിയിലെ 150 കോടിയുടെ റെയ്​ഡ്​; നോട്ടുകെട്ടുകൾ കൊണ്ടുപോയത്​ ട്രക്കിൽ, ​പൊലീസ്​ അകമ്പടിയും

കാൺപൂർ: ഉത്തർപ്രദേശിലെ ബിസിനസുകാരന്‍റെ വീട്ടിൽനിന്ന്​ ആദായനികുതി വകുപ്പ്​ പിടിച്ചെടുത്ത 150 കോടി ബാങ്കിലേക്ക്​ മാറ്റുന്നത്​ കണ്ടെയ്​നറിൽ. ആദായ നികുതി, ജി.എസ്​.ടി വകുപ്പുകൾ സംയുക്തമായായിരുന്നു പരിശോധന.

150 കോടി രൂപ അലമാരയിൽ അട്ടിയിട്ട്​ ​വെച്ചിരിക്കുന്നതിന്‍റെയും നോട്ടെണ്ണൽ മെഷീൻ ഉപയോഗിച്ച്​ എണ്ണിത്തിട്ടപ്പെടുത്തുന്നതിന്‍റെയും ദൃശ്യങ്ങൾ പുറത്തുവന്നിരുന്നു. വ്യാഴാഴ്ചയായിരുന്നു പരിശോധന. 24 മണിക്കൂറിൽ അധികം നീണ്ടുനിന്ന പരിശോധനയിൽ നോട്ടുകെട്ടുകൾ കൂട്ടിയിട്ടിരിക്കുന്നതിൻറെ ചിത്രങ്ങളും പുറത്തുവന്നിരുന്നു.

150 കോടിയിലധികം രൂപയും കണ്ടെയ്​നറിൽ ബാങ്കിലേക്ക്​ മാറ്റി. രണ്ടു പൊലീസ്​ വാഹനങ്ങളുടെയും ദ്രുത കർമ സേനയുടെയും അകമ്പടിയോടെയാണ്​ പണം ബാങ്കിലേക്ക്​ മാറ്റുന്നത്​.

ജി.എസ്​.ടി ഇന്‍റലിജൻസിന്‍റെ അഹ്​മദാബാദ്​ യൂണിറ്റ്​ കാൺപൂരിലെ ​ത്രിമൂർത്തി ഫ്രാഗൻസ്​ പ്രൈവറ്റ്​ ലിമിറ്റഡുമായി ബന്ധപ്പെട്ടവരുടെ വീട്ടിലും ഓഫിസിലും ഗോഡൗണിലുമാണ്​​ പരിശോധന നടത്തിയത്​. പീയുഷ്​ ജെയിനിന്‍റെ വീട്ടിലും ഓഫിസുകളിലുമായിരുന്നു പരിശോധന. കാൺപൂർ, മുംബൈ, ഗുജറാത്ത്​ എന്നിവിടങ്ങളാണ്​ ജെയിനിന്‍റെ ബിസിനസ്​ മേഖല.

നികുതി അടക്കാതെ വ്യാജ കമ്പനിയുടെ ഇൻവോയ്​സുകൾ ഉണ്ടാക്കിയാണ്​ ജി.എസ്​.ടി തട്ടിപ്പ്​ നടത്തിയിരിക്കുന്നതെന്ന്​ ജി.എസ്​.ടി വകുപ്പ്​ പറയുന്നു. 50,000 രൂപയുടെ 200 ലധികം ഇത്തരം ഇൻവോയ്​സുകളും കണ്ടെത്തി. ഇതുവരെയും ആരുടെയും അറസ്റ്റ്​ രേഖപ്പെടുത്തിയിട്ടില്ല.