മദ്യം കോവിഡി​ന്റെ അപകട സാധ്യത വർധിപ്പിക്കുമെന്ന്​ ഡോക്​ടർമാർ

ന്യൂഡൽഹി: മദ്യം കോവിഡിനെ പ്രതിരോധിക്കുമോ? വൈറസിനെ നശിപ്പിക്കാൻ മദ്യം ഉത്തമമാണെന്ന കാര്യകാരണസഹിതമുള്ള പ്രചാരണം കേൾക്കു​മ്പോൾ ആർക്കും തോന്നും കാര്യം ശരിയാണെന്ന്​. എന്നാൽ, ഡോക്​ടർമാർ പറയുന്നത്​ നേരെ തിരിച്ചാണ്​. കോവിഡുമായി ബന്ധപ്പെട്ട അപകടസാധ്യത വർധിപ്പിക്കുന്നതാണ്​ മദ്യം എന്നാണ്​ ഡൽഹിയിലെ ഡോക്​ടർമാർ പറയുന്നത്​. 

മദ്യപാനത്തി​ന്റെ അളവ്​ വർധിക്കു​മ്പോൾ ശരീരത്തി​ന്റെ പ്രതിരോധ ശേഷി ഗണ്യമായി കുറയുകയാണ്​ ചെയ്യുക. കോവിഡ്​ പോലുള്ള വൈറസുകളെ പ്രതിരോധിക്കാനുള്ള ശരീരത്തി​ന്റെ ശേഷിയാണ്​ മദ്യപാനത്തിലൂടെ ഇല്ലാതാകുന്നതെന്നർഥം. 

‘സമ്മർദം കുറക്കാനാണ്​ പലരും മദ്യം ഉപയോഗിക്കുന്നത്​. എന്നാൽ, മദ്യപിക്കു​മ്പോൾ ജാഗ്രത നഷ്​ടപ്പെടുകയും ആലോചിച്ച്​ തീരുമാനമെടുക്കാനുള്ള ശേഷി നഷ്​ടപ്പെടുകയും ചെയ്യുന്നു. ​ സൂക്ഷ്മത ആവശ്യമുള്ള ഇത്തരം ഘട്ടങ്ങളിൽ ഇത്​ വളരെ അപകടകരമാണ്​’ - കൺസൾട്ടൻറ്​ സൈക്യാട്രിസ്​റ്റ്​ ഡോ. മനീഷ്​ ജെയ്​ൻ പറയുന്നു. 

‘മദ്യം ശരീരത്തിലെ ഒാരോ അവയവത്തെയും ബാധിക്കുന്നു. ശരീരത്തി​ന്റെ പ്രതിരോധ സംവിധാനം ദുർബലപ്പെടുത്തുന്നു.  പകർച്ചവ്യാധികളെ നേരിടാനുള്ള കരുത്ത്​ ശരീരത്തിന്​ നഷ്​ടപ്പെടുന്നു’ - ഡോ. മനീഷ്​ ജെയ്​ൻ ചൂണ്ടിക്കാട്ടി.

മദ്യം സമ്മർദം കുറക്കുമെന്നത്​ തെറ്റായ ധാരണയാണെന്ന്​ സൈക്യാട്രിസ്​റ്റ്​ ഡോ. രാജീവ്​ മെഹ്​ത പറയുന്നു. ‘മദ്യം നിങ്ങളെ കൊല്ലുകയാണ്​. അത്​ സമ്മർദം ഇല്ലാതാക്കുന്നില്ല. ബോധം നശിപ്പിക്കുക മാത്രമാണ്​ ചെയ്യുന്നത്​. ബോധം നശിക്കുമ്പോൾ സമ്മർദം ഇല്ലാതാകുന്നുവെന്ന്​ തോന്നുക മാത്രമാണ്​’ - ഡോ രാജീവ്​ മെഹ്​ത പറയുന്നു. 

30-40 ദിവസത്തേക്ക്​ മദ്യം ഒഴിവാക്കാമെങ്കിൽ അതിൽ കൂടുതൽ കാലത്തേക്കും മദ്യത്തെ മാറ്റി നിർത്താമെന്നാണ്​ ജനങ്ങൾ മനസിലാക്കേണ്ടതെന്നും അദ്ദേഹം പറയുന്നു.