ത്രിപുരയിൽ കോൺഗ്രസ്​ മേധാവി രാജി നൽകി; മണിക്കൂറുകൾക്കിടെ പിൻവലിച്ചു

ന്യൂഡൽഹി: ത്രിപുരയിൽ കോൺഗ്രസിനെ പ്രതിസന്ധിയിലാക്കി ശനിയാഴ്ച രാജി പ്രഖ്യാപിച്ച ആക്​ടിങ്​ പ്രസിഡന്‍റ്​ കാന്തി ബിശ്വാസ്​ മണിക്കൂറുകൾ കഴിഞ്ഞ്​ പിൻവലിച്ചു. തന്‍റെ പ്രശ്​നങ്ങൾ പരിഹരിക്കാമെന്ന്​ നേതൃത്വം ഉറപ്പുനൽകിയെന്ന്​ പറഞ്ഞാണ്​ നയംമാറ്റം.

വ്യക്​തിപരമായ പ്രശ്​നങ്ങളുടെ പേരിലാണ്​ രാജിയെന്നും രാഷ്​ട്രീയം വിടുകയാണെന്നും​ നേരത്തെ കാന്തി ബിശ്വാസ്​ വ്യക്​തമാക്കിയിരുന്നു. എന്നാൽ, അതല്ലാത്ത പ്രശ്​നങ്ങളും പരിഹരിക്കപ്പെടാനാണ്ടെന്നും അങ്ങനെയെങ്കിൽ സംസ്​ഥാന അധ്യക്ഷ പദവിയിൽ തുടരുമെന്നും​ പിന്നീട്​ തിരുത്തി. അതിനൊടുവിലാണ്​ തിരിച്ചുവരവ്​.

പാർട്ടി ഹൈകമാൻഡിന്‍റെ സമ്മർദത്തിന്​ വഴങ്ങിയാണ്​ മടക്കമെന്നാണ്​ സൂചന. വടക്കുകിഴക്കൻ സംസ്​ഥാനങ്ങളിൽ നഷ്​ടമായ അധികാരം തിരിച്ചുപിടിക്കാൻ പാർട്ടി ശ്രമം സജീവമാക്കിയതി​നിടെയുണ്ടായ രാജി കൂടുതൽ തിരിച്ചടിയായിരുന്നു. രണ്ടു വർഷത്തിനിടെ നിയമസഭ തെരഞ്ഞെടുപ്പ്​ നടക്കാനിരിക്കുന്ന സംസ്​ഥാനമാണ്​ ത്രിപുര. കഴിഞ്ഞ ദിവസം സമാനമായി ​മറ്റൊരു കോൺഗ്രസ്​ നേതാവ്​ സുഷ്​മിത ദേവ്​ രാജിവെച്ച്​ തൃണമൂലിൽ ചേർന്നിരുന്നു.