രാജിവെച്ച മഹാരാഷ്​ട്ര സ്​പീക്കർ നാന പടോലെ സംസ്​ഥാന കോ​ൺഗ്രസ്​ അധ്യക്ഷൻ

മുംബൈ: മഹാരാഷ്​ട്ര നിയമസഭ സ്​പീക്കർ പദവിയിൽ നിന്ന്​ രാജിവെച്ച നാനാ പടോലെയെ മഹാരാഷ്​ട്ര പ്രദേശ്​ കോൺഗ്രസ് കമ്മിറ്റി(എം.പി.സി.സി)​ അധ്യക്ഷനായി നിയമിച്ചു. വെള്ളിയാഴ്​ചയാണ്​ ഇതു സംബന്ധിച്ച്​ പ്രഖ്യാപനം വന്നത്​.

പുതിയ കമ്മിറ്റിയിൽ ആറ്​ വർക്കിങ്​ പ്രസിഡൻറുമാരുണ്ടാകും. മുതിർന്ന കോൺഗ്രസ്​ നേതാവ്​ സുശീൽ കുമാർ ഷിൻഡെയു​ടെ മകൾ പ്രണിതി ഷിൻഡെ ആണ്​ ഒരു വർക്കിങ്​ പ്രസിഡൻറ്​.

വ്യാഴാഴ്​ചയാണ്​ നാനാ പടോലെ ഡെപ്യൂട്ടി സ്​പീക്കർ നർഹരി ഷിർവാളിന്​ രാജിക്കത്ത്​ കൈമാറിയത്​.

ഭാന്ദര ജില്ലയിലെ സകോലിയിൽ നിന്നുളള എം.എൽ.എയാണ്​ നാനാ പടോലെ. റവന്യൂ മന്ത്രിയായ ബാലസാഹേബ് തൊറാത്തിനെ മാറ്റിയാണ്​ പടോലെയെ സംസ്ഥാന അധ്യക്ഷനാക്കുന്നത്​. മഹാരാഷ്ട്രയിൽ ശിവസേനയുമായും നാഷനലിസ്റ്റ് കോൺഗ്രസ് പാർട്ടിയുമായും (എൻ.സി.പി) അധികാരം പങ്കിടുകയാണ്​ കോൺഗ്രസ്.

വിദർഭയിൽ നിന്നുള്ള കർഷക നേതാവ്​ കൂടിയായിരുന്നു നാനാ പടോലെ. 2014 ൽ ബി.ജെ.പി എം.പിയായിരുന്ന ഇദ്ദേഹം മോദി സർക്കാറിന്‍റെ കർഷകവിരുദ്ധ നയങ്ങളെ തുടർന്ന് രാജിവെച്ച് കോൺഗ്രസിൽ തിരിച്ചെത്തുകയായിരുന്നു.