ശ്രീരാമൻ സാങ്കൽപ്പികമെന്ന് പറഞ്ഞ കോൺ​ഗ്രസുകാർ ഇന്ന് ജയ്ശ്രീറാം വിളിക്കുന്നു - നരേന്ദ്ര മോദി

ന്യൂഡൽഹി: ശ്രീരാമൻ സാങ്കൽപ്പികമാണെന്ന് വിളിച്ചുപറഞ്ഞ കോൺ​ഗ്രസുകാർ ഇപ്പോൾ ജയ്ശ്രീറാം വിളിക്കുകയാണെന്ന് പ്രധാനമന്ത്രി നരേന്ദ്ര മോദി. ഹരിയാനയിലെ രേവാരിയിൽ എയിംസിന്റെ തറക്കല്ലിടൽ ചടങ്ങിന് ശേഷം സംസാരിക്കുന്നതിനിടെയായിരുന്നു അദ്ദേഹത്തിന്റെ പരാമർശം.

ജമ്മു കശ്മീരിന് പ്രത്യേക പദവി നൽകുന്ന 370-ാം അനുച്ഛേദം റദ്ദാക്കുന്നതിനെതിരെ കോൺ​ഗ്രസ് പലപ്പോഴും മുടക്കുണ്ടാക്കിയിട്ടുണ്ട്. എന്നാൽ ആർട്ടിക്കിൾ 370 റദ്ദാക്കുമെന്ന് മോദി ജനങ്ങൾക്ക് ഉറപ്പ് നൽകിയിരുന്നുവെന്നും ഈ ഉറപ്പ് നടപ്പിലാക്കിയെന്നും മോദി പറഞ്ഞു. രാജ്യത്തിനായി രാമക്ഷേത്രം പണിയുമെന്ന ​ഗ്യാരണ്ടി നൽകി. അതും നടപ്പിലാക്കി. 2013ൽ പ്രധാനമന്ത്രി സ്ഥാനാർത്ഥിയാക്കി പാർട്ടി പ്രഖ്യാപിച്ച ശേഷം ആദ്യമെത്തിയത് രേവാരിയിലാണ്. അന്ന് ഉറപ്പ് നൽകിയ ​ഗ്യാരണ്ടികളെല്ലാം നടപ്പിലാക്കിയാണ് രണ്ടാം വരവ്. ഇനി വരുമ്പോൾ ജനങ്ങളുടെ എൻ.ഡി.എ 400 സീറ്റിൽ വിജയിച്ച ശേഷമായിരിക്കുമെന്നും മോദി പറഞ്ഞു. സീറ്റ് രാഷ്ട്രീയത്തിൽ നിർബന്ധമാണെങ്കിലും തനിക്ക് ജനങ്ങളുടെ ആശീർവാദമാണ് വലുതെന്നും മോദി പറഞ്ഞു.

രാജ്യം ഉയരങ്ങളിലെത്തിയെന്നും അതിന് കാരണം ജനങ്ങളുടെ അനു​ഗ്രഹമാണെന്നും അദ്ദേഹം കൂട്ടിച്ചേർത്തു. ഖത്തറിലും യു.എ.ഇയിലും നടത്തിയ സന്ദർശനത്തെ കുറിച്ചും അദ്ദേഹം പരാമർശിച്ചു. രാജ്യത്തിന്റെ വിവിധ കോണുകളിൽ നിന്നും ഇന്ത്യക്ക് ലഭിക്കുന്ന സ്നേഹം മോദിക്ക് മാത്രമുള്ളതല്ല, ഓരോ ഇന്ത്യക്കാരനുമുള്ളതാണെന്നും പ്രധാനമന്ത്രി കൂട്ടിച്ചേർത്തു.