'ഒരു കൊല്ലം മുമ്പേ ഞങ്ങൾ മുന്നറിയിപ്പു നൽകി, മുഖവിലക്കെടുക്കാതെ മോദിയും കൂട്ടരും പാത്രം കൊട്ടുകയായിരുന്നു'- വൈറലായി രാഹുലിന്‍റെ പ്രസംഗം

ന്യൂഡൽഹി: കോവിഡ്​ മഹാമാരിയെ ഫലപ്രദമായി നേരിടുന്നതിൽ കേ​ന്ദ്ര സർക്കാർ പരാജയമാണെന്ന്​ വ്യാപക ആക്ഷേപമുയരുന്ന സാഹചര്യത്തിൽ കോൺഗ്രസ്​ നേതാവ്​ രാഹുൽ ഗാന്ധിയുടെ മുൻകാല ട്വീറ്റുകൾക്കും പ്രസംഗങ്ങൾക്കും​ വൻ പ്രാധാന്യമാണ്​ കൈവന്നിരിക്കുന്നത്​. ഇന്ത്യയിൽ ലോക്​ഡൗൺ പ്രഖ്യാപിക്കുന്നതിനും 41 ദിവസം മുമ്പ്​ ഫെബ്രുവരിയിൽ കേ​ാറോണ വൈറസ്​ രാജ്യത്തിനും സമ്പദ്​വ്യവസ്​ഥക്കും കനത്ത വെല്ലുവിളിയാണെന്നും കേന്ദ്ര സർക്കാർ ഇതിനെ ഗൗരവത്തിൽ എടുക്കുന്നില്ലെന്നും രാഹുൽ ട്വീറ്റ്​ ചെയ്​തിരുന്നു.

ഒരു വർഷം മുമ്പ് തങ്ങൾ സർക്കാറിനെ ഓർമിപ്പിച്ച കാര്യങ്ങളും രാജ്യത്തിന്‍റെ ഇന്നത്തെ സ്​ഥിതിയും കൃത്യമായി വരച്ചു കാണിക്കുന്ന രാഹുലിന്‍റെ ഒരു പ്രസംഗമാണ്​ സമൂഹ മാധ്യമങ്ങളിൽ ഇപ്പോൾ ശ്രദ്ധ നേടുന്നത്​. ബംഗാൾ നിയമസഭ തെരഞ്ഞെടുപ്പ്​ പ്രചാരണത്തിനിടെ ഡാർജിലിങ്ങിൽ രാഹുൽ നടത്തിയ പ്രസംഗമാണ്​ വൈറലായത്​.

'രാജ്യത്ത്​ ഒരു കൊടുങ്കാറ്റ്​ ആഞ്ഞടിക്കാൻ പോകുകയാണെന്ന്​ അന്നേ ഞങ്ങൾ മുന്നറിയിപ്പ്​ നൽകിയിരുന്നു. രാജ്യത്തെ മൊത്തം തകർക്കാൻ പോന്ന ഒന്നാകും അതെന്നായിരുന്നു അന്ന്​ പറഞ്ഞത്​. രാഹുൽ വെറുതെ ആളുകളെ പരിഭ്രാന്തരാക്കാൻ വേണ്ടി പറയുകയാണെന്നായിരുന്നു മാധ്യമങ്ങളടക്കം അന്ന്​ പറഞ്ഞത്'- രാഹുൽ ഗാന്ധി പറഞ്ഞു​​.

ഇന്ത്യയെ കോവിഡ്​ മഹാമാരി അതിരൂക്ഷമായി ബാധിക്കുമെന്നും രാജ്യത്തെയും അതിന്‍റെ സമ്പദ്​വ്യവസ്​ഥയെയും രക്ഷിക്കാനും, തൊഴിൽ സംരക്ഷിക്കാനും, ചെറുകിട വ്യവസായികളെയും വ്യാപാരികളെയും സംരക്ഷിക്കാനും വേണ്ട മാർഗങ്ങൾ കൈകൊള്ളാൻ ഞങ്ങൾ പ്രധാനമന്ത്രിയോട്​ ആവശ്യപ്പെട്ടിരുന്നു. ഒരു വർഷം മുമ്പ് കൃത്യമായി പറഞ്ഞാൽ 2020 ഫെബ്രുവരിയിലായിരുന്നു അത്​​.

'സഹോദരി സഹോദരൻമാരെ കോറോണ വൈറസ്​ വരികയാണ്​ അത്​ ​െകാണ്ട്​ നിങ്ങൾ പാത്രം കൊട്ടൂ. ​കോറോണ ഓടിപ്പോകും എന്നായിരുന്നു നരേന്ദ്ര മോദി പറഞ്ഞത്. ​അദ്ദേഹം രാജ്യത്തെ മുഴുവൻ ജനങ്ങളെയും കൊണ്ട്​ പാത്രം കൊട്ടിപ്പിച്ചു. എന്തുകൊണ്ടാണ്​ ജനങ്ങൾ പാത്രം കൊട്ടിയതെന്ന്​ എനിക്കറിയില്ല. അതിന്​ ശേഷം ജനങ്ങളോട്​​ കൈയടിക്കാനും മണി മുഴക്കാനും ആവശ്യപ്പെട്ടു. ജനങ്ങൾ അതും അനുസരിച്ചു. അതിന്​ ശേഷം മൊബൈൽ ഫോൺ എടുത്ത്​ പ്രകാശിപ്പിക്കാൻ പറഞ്ഞു. അദ്ദേഹമാണ്​ ഇന്ന്​ ഇന്ത്യയുടെ പ്രധാനമന്ത്രി.' -രാഹുൽ പറഞ്ഞു.

രാജ്യം ദുരന്തത്തെ നേരിടു​േമ്പാൾ നടപടികൾ കൈകൊള്ളാതെ തകർന്ന്​ കൊണ്ടിരിക്കുന്ന സമ്പദ്​വ്യവസ്​ഥയെ താങ്ങിനിർത്താൻ ശ്രമിക്കാതെ പലായനം ചെയ്യുന്ന തൊഴിലാളികൾക്ക്​ സൗജന്യ ബസ്​, ട്രെയിൻ ടിക്കറ്റുകൾ നൽകാതെ മോദി സർക്കാർ പൗരൻമാരെ ​െകാണ്ട്​ മണി മുഴക്കിപ്പിക്കുകയായിരുന്നുവെന്ന്​ രാഹുൽ കുറ്റപ്പെടുത്തി​.

'എല്ലാ മാധ്യമങ്ങളും 24 മണിക്കൂറും പാത്രം കൊട്ടുന്നതും മണി മുഴക്കുന്നതും സംപ്രേഷണം ചെയ്​ത്​ കൊണ്ടിരുന്നു. ഇപ്പോൾ ഉത്തർപ്രദേശിൽ പോയാൽ മൃതദേഹങ്ങൾ കൂട്ടിയിട്ടിരിക്കുന്നത്​ നിങ്ങൾക്ക്​ കാണാൻ സാധിക്കും. മൃതദേഹങ്ങൾ സംസ്​കരിക്കാൻ സ്​ഥലം തികയാതെ വരുന്നു. നരേന്ദ്ര മോദിയും മാധ്യമങ്ങളും ഇതിനെ കുറിച്ച്​ എന്തെങ്കിലും പറഞ്ഞോ​?' -രാഹുൽ ചോദിച്ചു.

തന്‍റെ പ്രസംഗത്തിനിടെ മാധ്യമങ്ങളെയും രാഹുൽ കടന്നാക്രമിക്കുന്നുണ്ട്​. 'കോറോണ വൈറസ്​ അതിവേഗം പടർന്ന്​ പിടിക്കുകയാണ്​. ലക്ഷക്കണക്കിനാളുകളാണ്​ മരിച്ചു വീഴുന്നത്​. ഇന്ത്യയുടെ സമ്പദ്​വ്യവസ്​ഥ തകിടം മറിഞ്ഞു. പ്രധാനമന്ത്രിയോ മാധ്യമങ്ങളോ ഇതിനെ കുറിച്ച്​ വല്ലതും മിണ്ടുന്നുണ്ടോ. അവരിൽ നിന്നും ഒരക്ഷരം പുറത്തുവരില്ല. രക്ഷകർത്താക്കളാണല്ലോ. രാജ്യത്തെയും ജനാധിപത്യത്തെയും രക്ഷിക്കാൻ ചുമതലയുള്ളവരാണിവർ. എന്നാൽ അവരെയെല്ലാം വിലക്കെടുത്തിരിക്കുകയാണ്​. 24 മണിക്കൂറും അവർ മോദിയെ കാണിക്കും. ഇത് അനേകം മന്ത്രിമാർ ഉർക്കൊള്ളുന്ന​ ഒരു സർക്കാരല്ല. ഇത്​ മോദിയുടെയും മൂന്ന്​ നാല്​ സുഹൃത്തക്കളുടെയും മാത്രം സർക്കാറാണ്' -രാഹുൽ പറഞ്ഞു​.

രാഹുലും കോൺഗ്രസും മു​മ്പ്​ പറഞ്ഞ പലതും ഇപ്പോൾ സത്യമായി പുലരുകയാണ്​. ഒരു വർഷം മുമ്പ്​ കോവിഡ്​ ഒരു കൊടുങ്കാറ്റായി ആഞ്ഞടിക്കുമെന്ന്​ രാഹുൽ മുന്നറിയിപ്പ്​ നൽകിയങ്കിലും നരേന്ദ്ര മോദിയും സർക്കാറും അതിനെ മുഖവിലക്കെടുക്കെടുത്തിരുന്നില്ല. ഇപ്പോൾ കോവിഡ്​ ഒരു കൊടുങ്കാറ്റാണെന്ന്​ പ്രധാനമന്ത്രി തന്നെ സമ്മതിച്ചിരിക്കുകയാണ്​.

പ്രതിദിനം മൂന്നര ലക്ഷത്തിനടുത്താണ്​ ഇന്ത്യയിൽ കോവിഡ്​ കേസുകൾ റിപ്പോർട്ട്​ ചെയ്യുന്നത്​. ഓക്​സിജൻ ക്ഷാമം മൂലം രാജ്യത്തെ ആശുപത്രികളിൽ നിരവധിയാളുകളാണ്​ മരിച്ചു വീഴുന്നത്​. ഉത്തരേന്ത്യൻ സംസ്​ഥാനങ്ങളിൽ മൃതദേഹങ്ങൾ സംസ്​കരിക്കാൻ ആളുകൾ വരി നിൽക്കുന്ന അവസ്​ഥയാണ്​. ഈ ഗൗരവതരമായ സാഹചര്യത്തിലും തികഞ്ഞ നിസംഗത മാത്രമാണ്​ കേന്ദ്ര സർക്കാർ പുലർത്തിപോരുന്നത്​.

ഇതിനെതിരെ സമൂഹ മാധ്യമങ്ങളിലടക്കം പ്രതിഷേധം ശക്​തമാണ്​. യു.പി.എ സർക്കാറിന്‍റെ കാലത്ത്​ മോദിയിട്ട പല ട്വീറ്റുകളും തിരിഞ്ഞുകൊത്തു​േമ്പാൾ കോവിഡിന്‍റെ രൂക്ഷത വിവരിക്കുന്ന രാഹുലിന്‍റെ ട്വീറ്റുകൾക്ക്​ പ്രാധാന്യം കൈവരികയാണ്​.