35 രൂപ മാസവാടക നൽകിയില്ല; അലഹാബാദ്​ കോൺഗ്രസ്​ ഒാഫീസ്​ ഒഴിയണമെന്ന്​ കെട്ടിട ഉടമ

ലക്​നോ: പ്രതിമാസം 35 രൂപ വാടക നൽകാത്തതിനാൽ കോൺഗ്രസിന്​ അലഹാബാദ്​ ഒാഫീസ്​ നഷ്​ടമാകും. ദശകങ്ങളായി പാർട്ടി വാടക അടക്കുന്നില്ല. കുടിശ്ശിക 50,000 രൂപ കവിഞ്ഞതോടെയാണ്​ കെട്ടിടം ഒഴിയണമെന്ന്​ ഉടമസ്​ഥർ പാർട്ടിയോട്​ ആവശ്യപ്പെട്ടിരിക്കുന്നത്​. 

അലഹാബാദിലെ തിരക്കേറിയ മേഖലയിലാണ്​ ഒാഫീസ്​ പ്രവർത്തിക്കുന്നത്​. എട്ട്​ ദശകങ്ങളായി ഇവിടെ ഒാഫീസ്​ പ്രവർത്തിക്കാൻ തുടങ്ങിയിട്ട്​. കെട്ടിടത്തി​​​െൻറ ഉടമായായ രാജ്​ കുമാർ സരസ്വത്​ വാടക കുടിശ്ശിക തീർത്ത്​ അടക്കുകയോ കെട്ടിടം ഒഴിയുകയോ ചെയ്യണമെന്ന്​ ആവശ്യപ്പെട്ട്​ നോട്ടീസ്​ നൽകിയിട്ടുണ്ട്​. 3000 ചതുരശ്ര അടി വിസ്​തൃതിയുള്ള കെട്ടിടം ഒഴിയണമെന്ന്​ ഇൗ വർഷം ആദ്യവും ഉടമ ആവശ്യപ്പെട്ടിരുന്നു. 

സ്വതന്ത്ര്യസമര ചർച്ചകൾ നടന്ന കെട്ടിടത്തിൽ നിരവധി മുതിർന്ന നേതാക്കൾ യോഗം ചേർന്നിരുന്നു. കെട്ടിടത്തി​​​െൻറ തിളക്കമാർന്ന ചരിത്രം ചൂണ്ടിക്കാട്ടി ഒാഫീസ്​ നിലനിർത്താൻ കോൺഗ്രസ്​ ദേശീയാധ്യക്ഷൻ രാഹുൽ ഗാന്ധിക്കും സംസ്​ഥാന പ്രസിഡൻറ്​ രാജ്​ ബബ്ബാറിനും പാർട്ടി നേതൃത്വം കത്തയച്ചിട്ടുണ്ട്​. 

ഒാഫീസ്​ ജീവനക്കാരിൽ നിന്നും സിറ്റി കോൺഗ്രസ്​ കമ്മിറ്റി ​പ്രവർത്തകരിൽ നിന്നും തുക പിരിച്ചെടുത്ത്​ വാടക കുടിശ്ശിക തീർക്കാനാണ്​ ശ്രമം.