മുഖ്യധാരാ മാധ്യമങ്ങളുടെ അവഗണനക്ക്​ മറുപടി; കോൺഗ്രസിന്‍റെ യൂട്യൂബ്​ ചാനൽ ഇന്നെത്തും

ന്യൂഡൽഹി: ഭീംറാവു അംബേദ്​കറിന്‍റെ ജന്മവാർഷികം ആഘോഷിക്കുന്ന ഇന്ന്​ കോൺഗ്രസ്​ പാർട്ടിയുടെ യൂട്യൂബ്​ ചാനൽ ലോഞ്ച്​ ചെയ്യും. 'ഐ.എൻ.സി ടി.വി' എന്നാണ്​ ചാനലിന്‍റെ പേര്​. മഹാത്മാ ഗാന്ധിയെയും അംബേദ്​കറിനെയും കുറിച്ചുള്ള ഡോക്യൂമെന്‍ററികൾ സംപ്രേഷണം ചെയ്​ത്​​ മുതിർന്ന നേതാക്കൾ ചാനലിന്​ തുടക്കം കുറിക്കും.

ഇനി മുതൽ ഈ ചാനലിലൂടെയാകും വിവിധ രാഷ്​ട്രീയ വിഷയങ്ങളിലെ പാർട്ടി നിലപാടും സർക്കാറിന്‍റെ നയപരിപാടികളിലുള്ള അഭിപ്രായ പ്രകടനങ്ങളും മറ്റും നടത്തുക.

ബി.ജെ.പി സർക്കാറിനെതിരായ സാമൂഹിക മാധ്യമങ്ങളിലൂടെയുള്ള കോൺഗ്രസിന്‍റെ പോരാട്ടത്തിന്​ യൂട്യൂബ്​ ചാനൽ സഹായകമാകുമെന്നാണ്​ വിലയിരുത്തൽ.

ഭരണകൂടത്തിന്​ അനുകൂലമായി ഏകപക്ഷീയമായി ചർച്ചകൾ സംഘടിപ്പിക്കുന്ന ചില ടി.വി ചാനലുകളുടെ നടപടിയിൽ പ്രതിഷേധിച്ച്​ പാർട്ടി കുറച്ച്​ മാസങ്ങൾക്ക്​ മുമ്പ്​ ചാനൽ ചർച്ചകളിൽ തങ്ങളുടെ പ്രതിനിധിക​ളെ അയക്കുന്നത്​ നിർത്തിയിരുന്നു. എന്നാൽ ശേഷം അവർ തീരുമാനം മാറ്റി. പ്രതിപക്ഷ പാർട്ടികളുടെ ശബ്​ദം ഉയർത്തിക്കാണിക്കാത്ത മുഖ്യധാരാ മാധ്യമങ്ങളെ ഇടക്കിടെ കോൺഗ്രസ്​ വിമർശിക്കാറുണ്ട്​.