രണ്ട്​ പാർട്ടിക്കും​​ ഒരേ സ്​ഥാനാർഥി; അബദ്ധം മനസിലാക്കി കോൺഗ്രസ്​ സ്​ഥാനാർഥിയെ മാറ്റി

ലഖ്​നോ: യു.പിയിൽ ശിവ്​പാൽ യാദവിൻെറ പാർട്ടി സ്​ഥാനാർഥിയെ കോൺഗ്രസും സ്​ഥാനാർഥിയായി പ്രഖ്യാപിച്ചു. ലോക്​സഭാ തെരഞ്ഞെടുപ്പിന്​ യു.പിയിലെ മഹാരാജ്​ഗഞ്ച്​ സീറ്റിലെ സ്​ഥാനാർഥി പ്രഖ്യാപനമാണ്​ അബദ്ധമായത്​. അബദ്ധം മനസിലായതേ ാടെ സ്​ഥാനാർഥിയെ മാറ്റി കോൺഗ്രസ്​ തടിയൂരി.

ജയിൽ ശിക്ഷ അനുഭവിക്കുന്ന രാഷ്​ട്രീയനേതാവ്​ അമർമാണി ത്രിപാഠിയുടെ മകൾ തനുശ്രീ ത്രിപാഠിയെയാണ്​ മഹാരാജ്​ഗഞ്ചിൽ മത്​സരിക്കാനായി കോൺഗ്രസും ശിവ്​പാൽ യാദവിൻെറ പ്രഗതിശീൽ സമാജ്​വാദി പാർട്ടി -ലോഹ്യയും നിയോഗിച്ചത്​. ശിവ്​പാൽ യാദവിൻെറ സ്​ഥാനാർഥിയും തനുശ്രീ ആണെന്ന്​ അറിഞ്ഞതോടെ കോൺഗ്രസ്​ സ്​ഥാനാർഥിയെ മാറ്റുകയായിരുന്നു.

ഡൽഹി ആസ്​ഥാനമായി പ്രവർത്തിക്കുന്ന മാധ്യമപ്രവർത്തക സുപ്രിയ ഷ്രിൻഡെയെയാണ്​ പുതിയ സ്​ഥാനാർഥിയായി തീരുമാനിച്ചിരിക്കുന്നത്​. സ്​ഥാനാർഥി പ്രഖ്യാപനം വന്നതോടെ കോൺഗ്രസിന്​ നന്ദി അറിയിച്ച്​ സുപ്രിയ രംഗത്തെത്തി.

ഞാൻ സജീവ രാഷ്​ട്രീയത്തിലേക്ക്​ ഇറങ്ങുന്നു. എന്നെ വിശ്വസിച്ച്​ മഹാരാജ്​ഗഞ്ച്​ ഏൽപ്പിച്ചതിന്​ കോൺഗ്രസിനോടും രാഹുൽ ഗാന്ധിയോടും പ്രിയങ്ക ഗാന്ധിയോടും ജ്യോതിരാദിത്യ സിന്ധ്യയോടും നന്ദിയുള്ളവളായിരിക്കും. മരിച്ചു പോയ പിതാവിൻെറ പാരമ്പര്യം സജീവമായി നിലനിർത്താൻ സാധിക്കുക എന്നത്​ ബഹുമാനമായി കാണുന്നു. ജനാധിപത്യത്തിൽ അർഥവത്തായ പങ്കു വഹിക്കുന്നതിനായി കാത്തിരിക്കുന്നു - എന്ന്​ സുപ്രിയ ട്വീറ്റ്​ ചെയ്​തു.

സുപ്രിയയുടെ പിതാവ്​ ഹർഷ വർധൻ മഹാരാജ്​ഗഞ്ചിൽ നിന്ന്​ രണ്ട്​ തവണ കോൺഗ്രസ്​ എം.പിയായിട്ടുണ്ട്​.