നഗ്രോട്ട ജവാൻമാരുടെ പേരിൽ കോൺഗ്രസ്​ രാഷ്​ട്രീയം കളിക്കുന്നു– വെങ്കയ്യ നായിഡു

ന്യൂഡൽഹി: നഗ്രോട്ട സൈനിക കേന്ദ്രത്തിലുണ്ടായ ഭീകരാക്രമണത്തിൽ  കൊല്ലപ്പെട്ട ജവാൻമാരുടെ പേരിൽ കോൺഗ്രസ്​ രാഷ്​ട്രീയം കളിക്കുന്നത്​ അപലപനീയമാണെന്ന്​ കേന്ദ്രമന്ത്രി വെങ്കയ്യ നായിഡു. ഭീകരാക്രമണത്തിൽ പ്രധാനമന്ത്രി നരേന്ദ്രമോദി മറുപടി പറയണമെന്ന്​  ആവശ്യപ്പെട്ട്​ ​കോൺഗ്രസ്​ എം.പിമാർ സഭ ബഹിഷ്​കരിച്ച്​ ഇറങ്ങുകയായിരുന്നു. ഇത്തരം വിഷയങ്ങളിൽ രാഷ്​ട്രീയം കളിക്കുന്നതിൽ ജനങ്ങൾ താൽപര്യപ്പെടുന്നില്ല. കോൺഗ്രസിന്​ ഒരു വിഷയത്തിലും ചർച്ചയല്ല ആവശ്യം. സഭാ നടപടികൾ തടസപ്പെടുത്തി ശ്രദ്ധനേടുകയെന്നതാണ്​. നാഗ്രോട്ടയിൽ രക്തസാക്ഷികളായ ധീര ജവാൻമാർക്ക്​ ആദരാഞജലിയർപ്പിക്കാൻ സർക്കാർ വിസമ്മതിച്ചുവെന്ന വാദവുമായി സഭ ബഹിഷ്​കരിച്ച കോൺഗ്രസ്​ നടപടി ജവാൻമാരെ അപമാനിക്കലാ​ണെന്നും വെങ്കയ്യ നായിഡു പറഞ്ഞു.
 
നഗ്രോട്ടയിൽ  സൈനിക ദൗത്യം തുടർന്നുകൊണ്ടിരിക്കയാണ്​. സൈനിക ഒാപ്പറേഷൻ തുടർന്നുകൊണ്ടിരിക്കെ അവിടെ കൊല്ല​പ്പെട്ട ജവാൻമാർക്ക്​ അന്ത്യാഞജലിയർപ്പിക്കുന്നത്​ ഉചിതമല്ല. അതുകൊണ്ടാണ്​ സ്​പീക്കർ അതിന്​ അനുമതി നിഷേധി​ച്ചതെന്നും അദ്ദേഹം പറഞ്ഞു.

കൊല്ലപ്പെട്ട ജവാൻമാർക്ക്​ ആദരാഞജലിയർപ്പിക്കുന്നതിന്​ സർക്കാർ വിസമ്മതിച്ചുവെന്നാരോപിച്ച്​ കോൺഗ്രസ്​ എം.പി മാർ പാർട്ടി ഉപാധ്യക്ഷൻ രാഹുൽ ഗാന്ധിക്കൊപ്പം സഭയിൽ നിന്ന്​ പുറത്തുപോവുകയായിരുന്നു.