തെലങ്കാനയിൽ തെരഞ്ഞെടുപ്പിന് മുമ്പായി മുഖ്യമന്ത്രിയെ പ്രഖ്യാപിക്കില്ലെന്ന് കോൺഗ്രസ്
text_fieldsഹൈദരാബാദ്: തെലങ്കാനയിൽ തെരഞ്ഞെടുപ്പിനുശേഷമേ മുഖ്യമന്ത്രിയെ തീരുമാനിക്കൂവെന്ന് കോൺഗ്രസ്. സംസ്ഥാനത്ത് ടി.ഡി.പി, സി.പി.െഎ, തെലങ്കാന ജനസമിതി എന്നീ പാർട്ടികളുമായി ചേർന്ന് തെരഞ്ഞെടുപ്പിൽ മത്സരിക്കുമെന്നും തെലങ്കാന ചുമതലയുള്ള എ.െഎ.സി.സി സെക്രട്ടറി ആർ.സി. കുന്തിയ പറഞ്ഞു. തെരഞ്ഞെടുപ്പിനുമുമ്പ് മുഖ്യമന്ത്രി സ്ഥാനാർഥിയെ പ്രഖ്യാപിക്കുന്ന കീഴ്വഴക്കം കോൺഗ്രസിലില്ല.
തെലങ്കാന പ്രദേശ് കോൺഗ്രസ് പ്രസിഡൻറ് ഉത്തം കുമാർ റെഡ്ഡി പ്രചാരണം നയിക്കും. പൊതുമിനിമം പരിപാടിയുടെ അടിസ്ഥാനത്തിലായിരിക്കും പാർട്ടി മത്സരിക്കുക. സഖ്യകക്ഷികളുമായി സീറ്റ് വിഭജനം പൂർത്തിയായിട്ടില്ലെന്നും കുന്തിയ പറഞ്ഞു.
നിയമസഭയുടെ കാലാവധി അവസാനിക്കുന്നതിന് എട്ടുമാസം മുമ്പുതന്നെ നിയമസഭ പിരിച്ചുവിടാൻ മുഖ്യമന്ത്രി കെ. ചന്ദ്രശേഖര റാവു മന്ത്രിസഭ ശിപാർശ ചെയ്യുകയായിരുന്നു. തെരഞ്ഞെടുപ്പ് തീയതി കമീഷൻ പ്രഖ്യാപിച്ചിട്ടില്ല. 2014ലെ തെരഞ്ഞെടുപ്പിൽ കോൺഗ്രസിന് 21 സീറ്റുകളിലേ ജയിക്കാനായുള്ളൂ. ബി.ജെ.പിയുമായി സഖ്യമുണ്ടാക്കിയ ടി.ഡി.പിക്ക് 15 എം.എൽ.എമാരുണ്ട്. തെലങ്കാന നിയമസഭയിൽ 119 അംഗങ്ങളാണുള്ളത്.
Don't miss the exclusive news, Stay updated
Subscribe to our Newsletter
By subscribing you agree to our Terms & Conditions.