ഡോ. സാവിത്രി വിശ്വനാഥ​െൻറ അന്ത്യകർമങ്ങൾ ചെയ്​തതും ചിതാഭസ്​മം നദിയിലൊതുക്കിയതും നസീർ ഹുസൈൻ എം.പി

ബെംഗളൂരു: എഴുത്തുകാരിയും ഡൽഹി യൂണിവേഴ്​സിറ്റി മുൻ അധ്യാപികയുമായ ഡോ. സാവിത്രി വിശ്വനാഥ​െൻറ ഹൈന്ദവാചാര പ്രകാരമുള്ള അന്ത്യകർമങ്ങൾക്ക്​ നേതൃത്വം നൽകി രാജ്യസഭ എം.പിയും കോൺഗ്രസ്​ നേതാവുമായ സയ്യിദ് നസീർ ഹുസൈനും ഭാര്യ മെഹ്​നാസും ​സമൂഹമാധ്യമങ്ങളിൽ കൈയ്യടി നേടി. കോവിഡ്​ ബാധിച്ചുമരിച്ച കുടുംബ സുഹൃത്തായിരുന്ന സാവിത്രിയുടെ ബന്ധുക്കളൊന്നും സ്ഥലത്തിലാത്തതിനാലാണ്​ അന്ത്യകർമങ്ങൾ​ ഇരുവരും നിർവഹിച്ചത്​.

മന്ത്രങ്ങൾ ഉച്ചരിക്കുന്നതിനും ആചാരങ്ങൾ പാലിക്കുന്നതിനുമായി പുരോഹിതൻമാർ സന്നിഹിതരായിരുന്നു. ഇവരുടെ നിർദേശപ്രകാരം ചിതാഭസ്​മം പുഴയിലൊതുക്കിയതും നസീർ ഹുസൈൻ തന്നെയായിരുന്നു. സാവിത്രിയുടെ കൂടെ താമസിച്ചിരുന്ന സഹോദരി ഡോ. മഹാലക്ഷ്​മിയും ആശു​പത്രിയിൽ ചികിത്സയിലായതിനാൽ അന്ത്യകർമങ്ങൾ നസീർ ഹു​സൈൻ ഏറ്റെടുക്കുകയായിരുന്നു.

പ്രമുഖ ഭാഷാ പണ്ഡിതയും അധ്യാപികയുമായിരുന്ന സാവിത്രി ഇന്ത്യയിൽ ജാപ്പനീഷ്​ ഭാഷ പ്രചരിപ്പിക്കുന്നതിൽ പുസ്​തകങ്ങൾ പരിഭാഷപ്പെടുത്തുന്നതിലും വലിയ പങ്കുവഹിച്ചിട്ടുണ്ട്​​. ഇന്ത്യൻ പ്രധാനമന്ത്രിമാർക്കൊപ്പവും വിദേശകാര്യമന്ത്രിമാർക്കൊപ്പവും ജപ്പാനുമായുള്ള ഔദ്യോഗിക ചർച്ചകളിൽ ഭാഷാസഹായിയായും സാവിത്രി സേവനം അനുഷ്​ഠിച്ചിട്ടുണ്ട്​​.

പട്ടാമ്പിയിൽ വയോധികയായ രോഗിയുടെ അന്ത്യസമയത്ത്​ ശഹാദത്​ കലിമ ചൊല്ലിയ ഡോ.രേഖയുടെ പ്രവർത്തിയോടാണ്​ എം.പിയുടെ പ്രവർത്തിയെ പലരും ഉപമിച്ചത്​. വർഗീയ വിദ്വേഷം പടർത്തുന്ന തേജസ്വി സൂര്യയടക്കമുള്ള ബി.ജെ.പി നേതാക്കളെ ഇതാണ്​ ഇന്ത്യയെന്ന ക്യാപ്​​ഷനോടെയും നിരവധി പേർ ടാഗ്​ ചെയ്​തു.