കീർത്തി ആസാദും അശോക്​ തൻവറും കോൺഗ്രസ്​ വിട്ട്​ തൃണമൂലിൽ

ന്യൂഡൽഹി: കോൺഗ്രസ്​ നേതാക്കളായ കീർത്തി ആസാദും അശോക്​ തൻവറും തൃണമൂൽ കോൺ​ഗ്രസിൽ. ന്യൂഡൽഹിയിലെ ഒൗദ്യോഗിക വസതിയിൽവെച്ച്​ തൃണമൂൽ കോൺഗ്രസ്​ അധ്യക്ഷയും പശ്ചിമ ബംഗാൾ മുഖ്യമന്ത്രിയുമായ മമത ബാനർജി 62കാരനായ കീർത്തി ആസാദിനെ പാർട്ടിയിലേക്ക്​ സ്വീകരിച്ചു.

ബി.ജെ.പി ഭിന്നിപ്പിന്‍റെ രാഷ്​ട്രീയം കളിക്കുകയാണ്​. ശരിയായ ദിശയിലേക്ക്​ നയിക്കാൻ രാജ്യത്തിന്​ ചിലരുടെ ആവശ്യമുണ്ട്​. മമത ബാനർജിക്ക്​ ആ നേതൃത്വപാടവമുണ്ടെന്ന്​ ഞാൻ കരുതുന്നു. അതിനാലാണ്​ തൃണമൂലിൽ ചേർന്നതെന്നും ആസാദ്​ മാധ്യമങ്ങളോട്​ പ്രതികരിച്ചു.

മുൻ ബിഹാർ മുഖ്യമന്ത്രി ഭഗവത്​ ഝാ ആസാദിന്‍റെ മകനാണ്​ കീർത്തി ആസാദ്​. ബിഹാറിലെ ദർഭംഗയിൽനിന്ന്​ മൂന്നുതവണ ലോക്​സഭ എം.പിയായും തെരഞ്ഞെടുക്കപ്പെട്ടു. 2015ൽ ബി.ജെ.പിയിൽനിന്ന്​ പുറത്തായ കീർത്തി ആസാദ്​ 2019 ഫെബ്രുവരിയിലാണ്​ കോൺഗ്രസിൽ ചേരുന്നത്​. ഡൽഹി ക്രിക്കറ്റ്​ അസോസിയേഷനുമായി ബന്ധപ്പെട്ട്​ അന്നത്തെ കേന്ദ്രമന്ത്രി അരുൺ ജെയ്​റ്റിലിക്കെതിരെ ആരോപണം ഉന്നയിച്ചതിന്​ പിന്നാലെയാണ്​ ക്രിക്കറ്റ്​ താരം കൂടിയായ കീർത്തി ആസാദ്​ ബി.ജെ.പി വിടുന്നത്​.

ഹരിയാന പ്രദേശ്​ കോൺഗ്രസ്​ കമ്മിറ്റിയുടെ മുൻ പ്രസിഡന്‍റായിരുന്നു 45കാരനായ അശോക്​ തൻവർ. ഹരിയാനയിലെ സിർസ മണ്ഡലത്തിൽനിന്ന്​ ലോക്​സഭാംഗമായും തെരഞ്ഞെടുക്ക​െപ്പട്ടിരുന്നു. 2019ൽ അപ്​ന ഭാരത്​ മോർച്ചയുടെ പേരിൽ തൻവർ കോൺഗ്രസ്​ വിടുകയായിരുന്നു. ഹരിയാന മുൻ മുഖ്യമന്ത്രി ഭൂപീന്ദർ സിങ്​ ഹൂഡ ഉൾപ്പെടെയുള്ളവരുമായുണ്ടായ തർക്കങ്ങളാണ്​ കോൺഗ്രസ്​ വിടാൻ കാരണം. ചൊവ്വാഴ്ച മമതയും അശോക്​ തൻവറും തമ്മിൽ കൂടിക്കാഴ​്​ച നടത്തി. തൻവറിനെ പാർട്ടിയിലേക്ക്​ സ്വീകരിക്കുകയും ചെയ്​തു.