രാഹുൽ ഗാന്ധിക്ക് രണ്ടാം അംബേദ്കറാകാൻ കഴിയുമെന്ന് കോൺഗ്രസ് ദലിത് നേതാവ്; പരിഹാസവുമായി ബി.ജെ.പി

ന്യൂഡൽഹി: രാഹുൽ ഗാന്ധിക്ക് ഒ.ബി.സി വിഭാഗങ്ങളുടെ രണ്ടാം അംബേദ്കറാകാൻ കഴിയുമെന്ന് കോൺഗ്രസ് നേതാവ് ഉദിത് രാജ്. എന്നാൽ ഇത്തരം പ്രസ്താവനയിലൂടെ കോൺഗ്രസ് നേതാവ് ബി.ആർ. അംബേദ്കറെയും ദലിത് സമുദായത്തെയും അപമാനിച്ചിരിക്കുകയാണെന്ന് ബി.ജെ.പി ആരോപിച്ചു. മുതിർന്ന ദലിത് നേതാവും ഡൽഹിയിൽ നിന്നുള്ള മുൻ എം.പിയുമാണ് ഉദിത് രാജ്. ശനിയാഴ്ച എക്സ് പോസ്റ്റ് വഴിയാണ് രാഹുൽ ഗാന്ധിയെ പിന്തുണക്കണമെന്ന് ഉദിത് രാജ് അഭ്യർഥിച്ചത്. പുരോഗമനത്തിലേക്കുള്ള അവസരങ്ങൾ ചരിത്രം വീണ്ടും വീണ്ടും നൽകില്ലെന്ന കാര്യം ഒ.ബി.സി വിഭാഗക്കാർ ഓർക്കണമെന്നും ഉദിത് രാജ് എക്സിൽ കുറിച്ചു.

ഡൽഹിയിലെ താ​ൽ​ക്ക​ത്തോ​റ സ്റ്റേഡിയത്തിൽ വെച്ച് രാഹുൽ ഗാന്ധി പറഞ്ഞ കാര്യങ്ങൾക്ക് ഉറച്ച പിന്തുണ നൽകണമെന്നും അദ്ദേഹം ഒ.ബി.സി വിഭാഗങ്ങളോട് അഭ്യർഥിച്ചു.

''ഒ.ബി.സി വിഭാഗം പിന്തുണക്കുകയാണെങ്കിൽ അവരുടെ രണ്ടാം അംബേദ്കറാണെന്ന് തെളിയിക്കാൻ രാഹുൽ ഗാന്ധിക്ക് കഴിയും''-എന്നും ഉദിത് രാജ് കുറിച്ചു.

''കോൺഗ്രസിന്റെ നേതൃത്വത്തിലുള്ള യു.പി.എ സർക്കാർ അധികാരത്തിലിരുന്നപ്പോൾ ജാതി സെൻസസ് നടത്താതിരുന്നത് വലിയ തെറ്റായിരുന്നുരെന്നും അത് തിരുത്താൻ താൻ പ്രതിജ്ഞാബദ്ധനാണ് എന്നുമായിരുന്നു രാഹുൽ ഗാന്ധി പ്രഖ്യാപിച്ചത്.

2004 മു​ത​ൽ താ​ൻ രാ​ഷ്ട്രീ​യ​ത്തി​ലു​ണ്ട്. തി​രി​ഞ്ഞു​നോ​ക്കു​മ്പോ​ൾ, ഒ.​ബി.​സി വി​ഭാ​ഗ​ക്കാ​​രെ വേ​ണ്ട രീ​തി​യി​ൽ സം​ര​ക്ഷി​ച്ചി​ല്ല എ​ന്ന തെ​റ്റ് ചെ​യ്തെ​ന്ന് എ​നി​ക്ക് ബോ​ധ്യ​മാ​യി. ഇ​വ​രു​ടെ പ്ര​ശ്ന​ങ്ങ​ൾ ആ​ഴ​ത്തി​ൽ മ​ന​സ്സി​ലാ​ക്കാ​ൻ ക​ഴി​യാ​ത്ത​തു​കൊ​ണ്ടാ​ണ് അ​തു സം​ഭ​വി​ച്ച​ത്. ഒ.​ബി.​സി ച​രി​ത്ര​ത്തെ​ക്കു​റി​ച്ചും, നേ​രി​ട്ട പ്ര​ശ്‌​ന​ങ്ങ​ളെ​ക്കു​റി​ച്ചും, കു​റ​ച്ചു​കൂ​ടി അ​റി​യാ​മാ​യി​രു​ന്നെ​ങ്കി​ൽ ആ ​സ​മ​യ​ത്തു​ത​ന്നെ ജാ​തി സെ​ൻ​സ​സ് ന​ട​ത്തു​മാ​യി​രു​ന്നു. ഇ​ത് കോ​ൺ​ഗ്ര​സ് പാ​ർ​ട്ടി​യു​ടെ തെ​റ്റ​ല്ല, എ​ന്റെ തെ​റ്റാ​ണ്. ആ ​തെ​റ്റ് ഞാ​ൻ തി​രു​ത്താ​ൻ പോ​വു​ക​യാ​ണ്- ഡ​ൽ​ഹി താ​ൽ​ക്ക​ത്തോ​റ സ്റ്റേ​ഡി​യ​ത്തി​ൽ ന​ട​ന്ന കോ​ൺ​ഗ്ര​സി​ന്റെ ഒ.​ബി.​സി സ​മ്മേ​ള​ന​ത്തി​ൽ രാ​ഹു​ൽ പ​റ​ഞ്ഞു.

അതേസമയം, ഉദിത് രാജിന്റെ പ്രസ്താവനയെ പരിഹസിച്ച് ബി.ജെ.പി വക്താവ് ഷെഹ്സാദ് പൂനവാല രംഗത്തുവന്നു. യഥാർഥ അംബേദ്കറെ ഒരിക്കലും ബഹുമാനിക്കാത്ത കോൺഗ്രസ് ആണ് ഇപ്പോൾ രണ്ടാം അംബേദ്കറെ കുറിച്ച് സംസാരിക്കുന്നത് എന്നായിരുന്നു പൂനവാലയുടെ പരിഹാസം. ''ദലിതുകളെയും അംബേദ്കറെയും അപമാനിക്കുന്നത് കോൺഗ്രസിന്റെ സ്വത്വമായി മാറിയിരിക്കുന്നു. ആരാണ് യഥാർഥ അംബേദ്കറെ അപമാനിച്ചത്? ആരാണ് അദ്ദേഹത്തിന് ഭാരത രത്നം നൽകാതിരുന്നത്? ജമ്മു കശ്മീരിൽ അദ്ദേഹത്തിന്റെ ഭരണഘടന നടപ്പിലാക്കാൻ ആരാണ് അനുവദിക്കാത്തത്? മുസ്‍ലിം സംവരണത്തെക്കുറിച്ച് ആരാണ് സംസാരിച്ചത്? ആരാണ് സംവരണം മോശമാണെന്ന് പറഞ്ഞത്… ജവഹർലാൽ നെഹ്‌റു തന്നെ. എന്നിട്ട് ഇപ്പോൾ അവർ നെഹ്‌റുവോ ഇന്ദിരാഗാന്ധിയോ അല്ല, രണ്ടാമത്തെ അംബേദ്കറാകാൻ ആഗ്രഹിക്കുന്നു? ഇതിനർഥം ഗാന്ധി കുടുംബം നെഹ്‌റുവും ഇന്ദിരാഗാന്ധിയും തെറ്റായ പാതയിലാണെന്ന് സമ്മതിക്കുന്നു എന്നല്ലേ. കോൺഗ്രസ് ഒരു കുടുംബത്തെ മാത്രം ആരാധിക്കുന്നതിൽ വിശ്വസിക്കുന്നു''-പൂനവാല പറഞ്ഞു.