ഭരണഘടനയുടെ അന്ത്യമെന്ന്​ ഗുലാംനബി​; ജനാധിപത്യത്തിലെ കറുത്തദിനമെന്ന്​ മഹ്​ബൂബ

ന്യൂഡൽഹി: ജമ്മു കശ്മീരിന്‍റെ പ്രത്യേക ഭരണഘടന പദവി റദ്ദാക്കി ഉത്തരവിറക്കുകയും സംസ്ഥാനത്തെ വിഭജിച്ച്​ കേന്ദ് ര ഭരണ പ്രദേശമാക്കുന്നതിനുള്ള ബിൽ അവതരിപ്പിക്കുകയും ചെയ്​തതിനെതിരെ രാജ്യസഭയിൽ വൻ പ്രതിഷേധം. കശ്​മീരിനുള്ള പ് രത്യേക പദവി നൽകുന്ന ആർട്ടിക്കിൾ 370 റദ്ദാക്കിയതിലൂടെ ബി.ജെ.പി സർക്കാർ ഭരണഘടനയുടെ അന്ത്യം കുറിച്ചുവെന്ന് ഗുലാം നബി ആസാദ് രാജ്യസഭയിൽ പ്രതികരിച്ചു. ഇന്ത്യയുടെ ഭരണഘടനക്ക്​ വേണ്ടിയാണ്​ തങ്ങൾ നിലകൊണ്ടത്​. ജീവൻപോലും ഭരണഘടനക്കായി നൽകാൻ തയാറാണ്​. അതിനാൽ ഭരണഘടനക്കെതിരായ സർക്കാർ നീക്കത്തെ അപലപിക്കുന്നുവെന്നും ഗുലാം നബി ആസാദ്​ പറഞ്ഞു.

ഇന്ത്യൻ ജനാധിപത്യത്തിലെ കറുത്ത ദിനമായി ഇൗ ദിവസത്തെ അടയാളപ്പെടുത്തുമെന്ന്​ കശ്​മീർ മുൻ മുഖ്യമന്ത്രി മഹ്​ബൂബ മുഫ്​തി ട്വീറ്റ്​ ചെയ്​തു. ആർട്ടിക്കിൾ 370 റദ്ദാക്കിയ കേന്ദ്രസർക്കാർ നീക്കം നിയമവിരുദ്ധവും ഭരണഘടനാവിരുദ്ധവുമാണ്​. ഇത്​ വൻ പ്രത്യാഘാതമാണുണ്ടാക്കുക. ജമ്മുകശ്​മീരിലെ ജനങ്ങളെ തീവ്രവാദികളാക്കികൊണ്ട്​ സംസ്ഥാനം പിടിച്ചടക്കാനുള്ള കേന്ദ്രസർക്കാർ നീക്കമാണിതെന്ന്​ വ്യക്തമാണ്​. ഇന്ത്യ കശ്​മീരിന്​ നൽകിയ വാഗ്​ദാനങ്ങൾ പാലിക്കുന്നതിൽ പരാജയപ്പെട്ടു. മുസ്​ലിം ഭൂരിപക്ഷ സംസ്ഥാനത്തെ ഇല്ലാതാക്കാനാണ്​ സർക്കാർ ശ്രമം. പാർലമ​െൻറിനോടും ജനാധിപത്യത്തോടുമുള്ള വിശ്വാസം നഷ്​ടപ്പെട്ടിരിക്കുകയാണെന്നും മഹ്​ബൂബ ട്വിറ്ററിലൂടെ പ്രതികരിച്ചു.

ആർട്ടിക്കിൾ 370 റദ്ദാക്കിയതിനെതിരെ പ്രതിഷേധിച്ച്​ പി.ഡി.പി എം.പിമാരായ മിർ ഫയാസ്​, നാസിർ അഹമ്മദ്​ ലാവേ എന്നിവർ ഭരണഘടന കീറിയെറിഞ്ഞു. ഇവരെ രാജ്യസഭയിൽനിന്ന് പുറത്താക്കി. ഫയാസ്​ സ്വന്തം വസ്​ത്രം കീറിയെറിഞ്ഞും പ്രതിഷേധിച്ചു.