ക്ഷേമം, വിമോചനം; അഞ്ചിന കാര്യപരിപാടിയുമായി കോൺഗ്രസ്​ പ്രകടന പത്രിക

ന്യൂഡൽഹി: അഞ്ചു വർഷത്തെ മോദിഭരണം നാശോന്മുഖമാക്കിയ ഇന്ത്യക്ക്​ വിമോചനം വാഗ്​ദാനം ചെയ്​ത്​ കോൺഗ്രസ്​. യുവാക്കൾക്ക്​ തൊഴിൽ, കർഷകന്​ സമാശ്വാസം, ദാരിദ്ര്യം നീക്കൽ, മെച്ചപ്പെട്ട സമ്പദ്​വ്യവസ്​ഥ, സുരക്ഷ എന്നിവക്ക്​ ഉൗന്നൽ. സമൃദ്ധിയും ക്ഷേമവുമെന്ന മുദ്രാവാക്യമാണ്​ ഇൗ തെരഞ്ഞെടുപ്പിൽ കോൺഗ്രസ്​ മുന്നോട്ടു വെക്കുന്നത്​.

ഒന്നാംഘട്ട വോ​െട്ടടുപ്പി​​െൻറ പ്രചാരണം ഒരാഴ്​ചക്കകം അവസാനിക്കാനിരിക്കേ, പ്രതീക്ഷകൾ നിറവേറ്റുമെന്ന വാഗ്​ദാനത്തോടെ പാർട്ടി അധ്യക്ഷൻ രാഹുൽ ഗാന്ധിയാണ്​ പത്രിക പുറത്തിറക്കിയത്​. പ്രതിവർഷം 72,000 രൂപ എന്ന ക്രമത്തിൽ അഞ്ചു വർഷംകൊണ്ട്​ രാജ്യത്തെ അഞ്ചു കോടി ദരിദ്ര കുടുംബങ്ങൾക്ക്​ ശരാശരി മൂന്നു ലക്ഷം രൂപ നൽകുന്ന ന്യായ്​ പദ്ധതി കോൺഗ്രസ്​ മുന്നോട്ടു വെക്കുന്ന പ്രധാന ഉറപ്പാണ്​.

പൊതുബജറ്റിനൊപ്പം പഴയ റെയിൽവേ ബജറ്റി​​െൻറ മാതൃകയിൽ പ്രത്യേക കിസാൻ ബജറ്റ്​ കൊണ്ടുവരും. തൊഴിലുറപ്പു പദ്ധതി ദിനങ്ങളുടെ എണ്ണം 100ൽ നിന്ന്​ 150 ആയി ഉയർത്തും. യുവാക്കൾക്ക്​ 22 ലക്ഷം തൊഴിലവസരങ്ങൾ. ബിസിനസ്​ തുടങ്ങുന്നവർക്ക്​ മുന്നു വർഷത്തേക്ക്​ ഒരുവിധ അനുമതികളും വാങ്ങേണ്ടതില്ല. കാർഷിക കടം തിരിച്ചടക്കാത്തതി​ന്​ ക്രിമിനൽ കേസെടുത്ത്​ ജയിലിൽ ഇടുന്ന രീതി അവസാനിപ്പിച്ച്​ സിവിൽ കേസായി കണക്കാക്കും.

വർഗീയതയുടെ ആൾക്കൂട്ട അതിക്രമങ്ങൾ തടയുന്നതിന്​ പുതിയ ലോക്​സഭയുടെ ആദ്യസമ്മേളനത്തിൽ നിയമം പാസാക്കും. ദേശദ്രോഹ നിയമവും, ​അസ്വസ്​ഥ സംസ്​ഥാനങ്ങളിൽ സേനക്ക്​ പ്രത്യേകാവകാശം നൽകുന്ന ‘അഫ്​സ്​പ’ നിയമവും എടുത്തുകളയും. കശ്​മീരിന്​ സാന്ത്വന സ്​പർശം; പ്രശ്​നപരിഹാരത്തിന്​ ചർച്ച. അഴിമതി തടഞ്ഞ്​ മെച്ച​െപ്പട്ട ഭരണക്രമം ഉറപ്പു വരുത്തും.

രാജ്യത്തെ 121 കേന്ദ്രങ്ങളിലായി നടത്തിയ കൂടിയാലോചനാ ​േയാഗങ്ങളിലും ഒാൺലൈൻ സംവിധാനങ്ങളിലുമായി കിട്ടിയ 1.60 ലക്ഷം അഭിപ്രായങ്ങളുടെ അടിസ്​ഥാനത്തിലാണ്​ പ്രകടന പത്രിക തയാറാക്കിയത്​. 12 രാജ്യങ്ങളി​െല പ്രവാസി പ്രതിനിധികളിൽ നിന്നുള്ള കാഴ്​ചപ്പാടും ശേഖരിച്ചിരുന്നു.

കോൺഗ്രസ്​ മുൻ അധ്യക്ഷ സോണിയ ഗാന്ധി, മുൻപ്രധാനമന്ത്രി മൻമോഹൻ സിങ്​, മുതിർന്ന നേതാക്കളായ എ.കെ. ആൻറണി, പി. ചിദംബരം, സംഘടനാ ചുമതലയുള്ള എ.​െഎ.സി.സി ജനറൽ സെക്രട്ടറി കെ.സി. വേണു​േഗാപാൽ എന്നിവരുടെ സാന്നിധ്യത്തിൽ എ.​െഎ.സി.സി ആസ്​ഥാനത്തു വെച്ചാണ്​ പ്രകടനപത്രിക പുറത്തിറക്കിയത്​. ഭരണകക്ഷിയായ ബി.ജെ.പിയുടെ പ്രകടന പത്രിക ഇറങ്ങിയിട്ടില്ല.

പ്രകടന പത്രികയിലെ പ്രധാന വാഗ്​ദാനങ്ങൾ

• പ്രത്യേക കർഷക ബജറ്റ്​​​്; കാർഷിക വികസനത്തിന്​ പ്രത്യേക കമീഷൻ
• പണമുറപ്പ്​ പദ്ധതി പ്രകാരം ദരിദ്ര കുടുംബങ്ങൾക്ക്​ പ്രതിവർഷം 72,000 രൂപ
• അടുത്ത മാ​ർച്ചിനു മുമ്പ്​ 22 ലക്ഷം യുവാക്കൾക്ക്​ തൊഴിൽ
• കൃഷി വായ്​പ തിരിച്ചടക്കാത്തവർക്കെതിരെ ക്രിമിനൽ കേസില്ല
• തൊഴിലുറപ്പ്​ പദ്ധതി ദിനങ്ങൾ 100ൽ നിന്ന്​ 150 ആക്കും
• ബിസിനസ്​ തുടങ്ങാൻ മൂന്നു വർഷത്തേക്ക്​ സർക്കാർ അനുമതികൾ വേണ്ട
• ആൾക്കൂട്ട അതിക്രമം തടയാൻ പ്രത്യേക നിയമം
• ആരോഗ്യ പരിപാലനം വയോജനങ്ങളുടെ അവകാശം
• ദേശദ്രോഹ നിയമവും ‘അഫ്​സ്​പ’യും പിൻവലിക്കും
• ജി.എസ്​.ടി പരിഷ്​കരിക്കും; ആദായ നികുതി നിരക്കുകൾ യുക്​തിസഹമാക്കും
• പ്രവാസി മന്ത്രാലയം പുനഃസ്​ഥാപിക്കും; പ്രവാസികൾക്ക്​ നിക്ഷേപ പദ്ധതി
• കശ്​മീരിന്​ സാന്ത്വന സ്​പർശം; പ്രശ്​നപരിഹാരത്തിന്​ ചർച്ച
• 12 വരെ പൊതുവിദ്യാഭ്യാസം സൗജന്യം; നിർബന്ധിതം
• വിദ്യാഭ്യാസ വിഹിതം ഇരട്ടിയാക്കും
• സ്​കൂൾ വിദ്യാഭ്യാസ ചുമതല സംസ്​ഥാനങ്ങൾക്ക്​
• മത്സ്യ മേഖലക്ക്​ പ്രത്യേക മന്ത്രാലയം
• വോട്ടുയന്ത്രം കുറ്റമറ്റതാക്കും
• സുപ്രീംകോടതിക്കും ഹൈകോടതിക്കുമിടയിൽ അപ്പീൽ കോടതി

LIVE: Congress President @RahulGandhi launches 2019 Manifesto. #CongressManifesto2019 https://t.co/th35WGsl63

— Congress (@INCIndia) April 2, 2019