കോവിഡ്​ വ്യാപനം: യു.പിയിൽ റാലികൾ റദ്ദാക്കി കോൺഗ്രസും ബി.ജെ.പിയും

ലഖ്​നോ: രാജ്യത്ത്​ കോവിഡ്​ വ്യാപനത്തിന്‍റെ പശ്ചാത്തലത്തിൽ നിയമസഭ തെരഞ്ഞെടുപ്പ്​ നടക്കാനിരിക്കുന്ന ഉത്തർപ്രദേശിലെ റാലികൾ റദ്ദാക്കി കോൺഗ്രസും ബി.ജെ.പിയും. പരിപാടികളിൽ ആളുകൂടുന്നത്​ കോവിഡ്​ വ്യാപനം രൂക്ഷമാക്കുമെന്ന നിരീക്ഷണത്തിന്‍റെ അടിസ്ഥാനത്തിലാണ്​ തീരുമാനം.

സംസ്​ഥാനങ്ങളിലെ സ്ഥിതിഗതികൾ വിലയിരുത്തിയ ശേഷം മാത്രം മുൻകൂട്ടി നിശ്ചയിച്ച പരിപാടികളുമായി മുന്നോട്ടുപോയാൽ മതിയെന്ന്​ നിർദേശം നൽകിയതായി എ.ഐ.സി.സി ജനറൽ സെക്രട്ടറി കെ.സി. വേണുഗോപാൽ അറിയിച്ചു. 'യു.പിയിലെയും തെരഞ്ഞെടുപ്പ്​ നടക്കാനിരിക്കുന്ന മറ്റു സംസ്ഥാനങ്ങളിലെയും പ്രധാന റാലികളെല്ലാം മാറ്റിവെച്ചു. അതത്​ സംസ്ഥാനങ്ങളിലെ കോവിഡ്​ സ്ഥിതിഗതികൾ വിലയിരുത്താനും അതി​നുശേഷം പരിപാടികളുടെ കാര്യത്തിൽ തീരുമാനമെടുക്കാനും ആവശ്യപ്പെട്ടു' -വേണുഗോപാൽ പറഞ്ഞു.

മൂന്നാം തരംഗത്തിന്​ സാധ്യതയുള്ളതിനാൽ സംസ്ഥാനങ്ങളിൽ വലിയ റാലികൾക്ക്​ അനുമതി നൽകരുതെന്ന്​ ആവശ്യപ്പെട്ട്​ തെരഞ്ഞെടുപ്പ്​ കമ്മീഷന്​​ കോൺഗ്രസ്​ കത്തയക്കുകയും ചെയ്തു.

അതേസമയം, കോവിഡ്​ വ്യാപനത്തിന്‍റെ പശ്ചാത്തലത്തിൽ ബി.ജെ.പിയും വലിയ റാലികൾ റദ്ദാക്കി. ഗൗതം ബുദ്ധ നഗറിൽ നടത്താനിരുന്ന സർക്കാർ പരിപാടി മുഖ്യമന്ത്രി യോഗി ആദിത്യനാഥ്​ റദ്ദാക്കുകയായിരുന്നു. ഒരാഴ്ചയിലേറെയായി ഇവിടെ കോവിഡ്​ കേസുകളുടെ എണ്ണത്തിൽ വൻവർധന രേഖപ്പെടുത്തുന്നതിന്‍റെ പശ്ചാത്തലത്തിലാണ്​ തീരുമാനം.

കഴിഞ്ഞദിവസം കോൺഗ്രസിന്‍റെ നേതൃത്വത്തിൽ ബറേലിയിൽ നടത്തിയ പെൺകുട്ടികളുടെ റാലിക്കെതിരെ വലിയ പ്രതിഷേധങ്ങൾ ഉയർന്നിരുന്നു. മാസ്​ക്​ പോലും ധരിക്കാതെയാണ്​ നൂറുകണക്കിന്​ പെൺകുട്ടികൾ മാര​ത്തണിൽ പ​ങ്കെടുത്തത്​. ഇതിനെതിരെ പൊതുവിമർശനം ഉയർന്ന സാഹചര്യത്തിലാണ്​ പൊതുപരിപാടികൾ ഒഴിവാക്കാനുള്ള രാഷ്ട്രീയപാർട്ടികളുടെ തീരുമാനം.