'ചെ​ങ്കോട്ട സംരക്ഷിക്കാൻ ഒരു സർക്കാറിന്​ കഴിയാതെ പോകുന്നത്​ രാജ്യത്തെ ആദ്യ സംഭവം'

ന്യൂഡൽഹി: റി​പ്പബ്ലിക്​ ദിനത്തിൽ ചെ​ങ്കോട്ടയിൽ കടന്നുകയറാൻ അഴിഞ്ഞാട്ടക്കാരെ അനുവദിച്ചതിന്​ ആഭ്യന്തര മന്ത്രി അമിത്​ഷാ രാജിവെക്കണമെന്ന്​ കോൺഗ്രസ്​. ചൊവ്വാഴ്​ച ചെ​ങ്കോട്ടയിൽ അനിഷ്​ട സംഭവങ്ങൾ ഉണ്ടാകാൻ കാരണം ഇൻറലിജൻസ്​ വിവരമുണ്ടായിട്ടും മുൻകരുതൽ നടപടി സ്വീകരിക്കാത്തതാണ്​. ഇത്​ ആഭ്യന്തര മന്ത്രിയുടെ വീഴ്​ചയാണ്​. ചെ​ങ്കോട്ട സംരക്ഷിക്കാൻ ഒരു സർക്കാറിന്​ കഴിയാതെ പോകുന്നത്​ ആദ്യ സംഭവമാണ്​.

ഒരു വർഷത്തിനിടയിൽ വ​ംശീയ അതിക്രമം അടക്കം രണ്ടുവട്ടം ദേശീയ തലസ്​ഥാനത്ത്​ അക്രമസംഭവങ്ങൾ നടന്നതിന്​ ആഭ്യന്തര മന്ത്രി ഉത്തരവാദിയാണ്​. അമിത്​ഷായെ പദവിയിൽ നിന്ന്​ പുറത്താക്കുകയാണ്​ വേണ്ടത്​. അതിന്​ തയാറായില്ലെങ്കിൽ, അമിത്​ ഷായെ പ്രധാനമന്ത്രി നരേന്ദ്രമോദി സംരക്ഷിക്കുന്നുവെന്നും ഗൂഡാലോചനയിൽ അദ്ദേഹത്തിന്​ പങ്കുണ്ടെന്നുമാണ്​ അർഥം.

അഴിഞ്ഞാട്ടം നടത്തിയവർക്കുപകരം കർഷക നേതാക്കൾ​ക്കെതിരെ ​എഫ്​.ഐ.ആർ രജിസ്​റ്റർ ചെയ്​തത്​ കടുത്ത അന്യായമാണ്. അക്രമകാരികൾക്കെതിരെ നടപടി സ്വീകരിക്കുന്നതിൽ ആഭ്യന്തര മന്ത്രി പരാജയപ്പെട്ടു. സമര നേതാവായി ഇറങ്ങിയ ദീപ്​ സിദ്ദുവിന്​ ബി.ജെ.പിയുമായി അടുത്ത ബന്ധമുണ്ടെന്നിരിക്കേ, ചെ​ങ്കോട്ടയിലെ സംഭവങ്ങൾക്കു പിന്നിലെ ഗൂഢാലോചന തെളിഞ്ഞു. കർഷക സംഘടനകളെയും അവരുടെ സമരത്തെയും അവമതിക്കാനുളള നീക്കമാണ്​ നടന്നതെന്നും കോൺഗ്രസ്​ വക്​താവ്​ രൺദീപ്​സിങ്​ സുർ​േ​ജവാല പറഞ്ഞു.