അഞ്ച്​ ലക്ഷം സൈബർ പോരാളികളെ തെരഞ്ഞെടുക്കാനൊരുങ്ങി കോൺഗ്രസ്

ന്യൂഡൽഹി: സമൂഹ മാധ്യമങ്ങളിൽ ബി.ജെ.പിക്കെതിരെ പോരാടാൻ അഞ്ച്​ ലക്ഷത്തോളം സൈബർ പോരാളികളെ സൃഷ്​ടിക്കാനൊരുങ്ങി കോൺഗ്രസ്​. ഇതിനായി 'ജോയിൻ കോൺഗ്രസ്​ സോഷ്യൽ മീഡിയ'രാജ്യവ്യാപക കാമ്പയിനിന്​ തിങ്കളാഴ്​ച തുടക്കം കുറിച്ചു.

'പെയ്​ഡ്​ ട്രോൾ ആർമി'രാജ്യത്ത്​ വെറുപ്പും വിദ്വേഷവും പ്രചരിപ്പിക്കുകയാണെന്നും അതിനെ തടയിടേണ്ട സമയമാണിതെന്നും കോൺഗ്രസ്​ മുൻ അധ്യക്ഷൻ രാഹുൽ ഗാന്ധി പറഞ്ഞു.

''എന്താണ്​ നടക്കുന്നതെന്ന് ചെറുപ്പക്കാരെന്ന നിലയിൽ നിങ്ങൾക്ക്​ കാണാൻസാധിക്കും​. നിങ്ങളു​ടെ സ്​കൂളുകളിൽ, കോളജുകളിൽ , സർവകലാശാലകളിൽ ഉപദ്രവങ്ങൾ നടക്കുന്നത്​ നിങ്ങൾക്ക്​ കാണാം. ഇന്ത്യയെന്ന ആ​ശയത്തിന്​ നേരെ ആക്രമണം നടക്കുന്നതും നിങ്ങൾക്ക്​ കാണാൻ സാധിക്കും. ഡൽഹിക്ക്​ പുറത്തേക്ക്​ നോക്കൂ, കർഷകർക്ക്​ എന്താണ്​ സംഭവിക്കുന്നതെന്ന്​ നിങ്ങൾക്ക്​ കാണാം. രാജ്യത്തെ ഈ യുദ്ധത്തി​െൻറ ന​ട്ടെല്ല്​ ട്രോൾ ആർമിയാണ്​. പുരോഗമന മൂല്യങ്ങളും സമാധാനവും സഹാനുഭൂതിയും ഒത്തൊരുമയും സ്​നേഹവും സംരക്ഷിച്ചീ നിർത്താൻ നമുക്കും പോരാളികൾ ആവശ്യമാണ്​​.'' -​അദ്ദേഹം പറഞ്ഞു. ഇത്​ സത്യത്തി​െൻറ സേനയാണ്​​. ഇന്ത്യയെന്ന ആശയത്തിന്​ പ്രതിരോധം തീർക്കുകയാണ്​ ഈ സേനയെന്നും രാഹുൽ കൂട്ടിച്ചേർത്തു.

വെബ്​സൈറ്റ്​ വഴിയും ടോൾ ഫ്രീ നമ്പർ വഴിയും വാട്​സ്​ആപ്പ്​ വഴിയും ആളുകൾക്ക്​ ഇൗ ഉദ്യമത്തിനൊപ്പം ​ ചേരാനാകുമെന്ന്​ എ.ഐ.സി.സി സമൂഹ മാധ്യമ മേധാവി റോഹൻ ഗുപ്​ത, എ.ഐ.സി.സി ഇൻ ചാർജ്ജ്​(അഡ്​മിനിസ്​ട്രേഷൻ) പവൻ കുമാർ ബൻസാൽ പാർട്ടി വക്താവ്​ പവൻ ഖേര എന്നിവർ അറിയിച്ചു.