ഛത്തിസ്ഗഢിൽ മന്ത്രി മുഹമ്മദ് അക്ബറിനെതിരെ വർഗീയ പരാമർശം: അസം മുഖ്യമന്ത്രിക്ക് തെരഞ്ഞെടുപ്പ് കമീഷൻ നോട്ടീസ്
text_fields
ന്യൂഡൽഹി: ഛത്തിസ്ഗഢിൽ തെരഞ്ഞെടുപ്പ് പ്രചാരണത്തിനിടെ സംസ്ഥാന മന്ത്രി മുഹമ്മദ് അക്ബറിനെതിരെ വർഗീയ പരാമർശം നടത്തിയ അസം മുഖ്യമന്ത്രിയും ബി.ജെ.പി നേതാവുമായ ഹിമന്ത ബിശ്വ ശർമക്ക് തെരഞ്ഞെടുപ്പ് കമീഷൻ കാരണം കാണിക്കൽ നോട്ടീസ് നൽകി. ഈ മാസം 30ന് വൈകീട്ട് അഞ്ചുമണിക്കകം വിശദീകരണം നൽകണം. ഒക്ടോബർ 18ന് കവർധയിൽ പ്രസംഗിക്കവെയാണ് ശർമ വിവാദ പരാമർശം നടത്തിയത്. ഇതിനെതിരെ കോൺഗ്രസ് തെരഞ്ഞെടുപ്പ് കമീഷന് പരാതി നൽകിയിരുന്നു.
‘കൗസല്യ മാതാവിന്റെ (ശ്രീരാമന്റെ മാതാവ്) നാട്ടിൽനിന്ന് അക്ബറിനെ നാടുകടത്തിയില്ലെങ്കിൽ ഈ ദേശത്തിന്റെ പവിത്രത നഷ്ടമാകും. ഒരു അക്ബറിന് ഇടംകൊടുത്താൽ, അയാൾ നൂറു അക്ബർമാരെയും കൊണ്ടുവരും. എത്രയും പെട്ടെന്ന് അയാളെ കെട്ടുകെട്ടിക്കുക.’ എന്നായിരുന്നു പ്രസംഗം. കൗസല്യയുടെ ജന്മദേശം ഇപ്പോഴത്തെ ഛത്തിസ്ഗഢ് ആണെന്നാണ് വിശ്വാസം. ഭൂപേഷ് ബാഘേൽ സർക്കാറിനെയും വർഗീയമായി ആക്രമിക്കുന്നതായിരുന്നു ഹിമന്തയുടെ പ്രസംഗം.