വർഗീയ പ്രചാരണം: ഡി.ജി.പിക്ക് പരാതി നൽകി

മംഗളൂരു​: വർഗീയ പ്രചാരണം നടത്തിയെന്ന്​ കാണിച്ച്​ കെ.പി.സി.സി വർക്കിങ്​ പ്രസിഡൻറ് സലിം അഹമ്മദി​​െൻറ നേതൃത്വത്തിൽ ഡി.ജി.പിക്ക് പരാതി നൽകി. കർണാടകയിൽ സർക്കാറി​​െൻറ കെടുകാര്യസ്ഥതകൊണ്ട് വ്യാപകമായി കോവിഡ്​ പടർന്ന​ുപിടിക്കുമ്പോൾ സംഘ്​പരിവാറും ആർ.എസ്.എസും ചില മാധ്യമങ്ങളും മുസ്​ലിം സമുദായത്തിനെതിരെ അക്രമം അഴിച്ചുവിടുകയാണെന്ന്​ പരാതിയിൽ ചൂണ്ടിക്കാട്ടി. മുസ്​ലിം സമൂഹമാണ് സംസ്ഥാനത്ത് വൈറസ് വ്യാപകമായി പരത്തുന്നതെന്ന ആരോപണം അഴിച്ചുവിട്ട് ഒരുസമുദായത്തെ പ്രതിക്കൂട്ടിൽ നിർത്തുകയാണ് സംഘ്​പരിവാർ. 

സർക്കാർ കെടുകാര്യസ്ഥതയും അഴിമതിയും കഴിവില്ലായ്മയും നിലനിൽക്കെ വൈറസിനെതിരെയുള്ള പോരാട്ടത്തിൽ സർക്കാറിനൊപ്പം ഉറച്ചു നിൽക്കുകയാണ് സംസ്ഥാന കോൺഗ്രസ്. ചിലയിടങ്ങളിൽ സംഘ്​പരിവാർ പ്രവർത്തകർക്കൊപ്പം ചില പൊലീസ് ഉദ്യോഗസ്ഥരും മുസ്​ലിംകളെ മർദിക്കുന്ന ദൃശ്യങ്ങൾ സമൂഹ മാധ്യമങ്ങളിൽ പ്രചരിക്കുന്നുണ്ടെന്നും ഇതിനെതിരെയും ശക്തമായ നടപടി സ്വീകരിക്കണമെന്ന്​ പരാതിയിൽ ആവശ്യപ്പെട്ടു.

ഡി.ജി.പി പ്രവീൺ സൂദ്, ബംഗളൂരു സിറ്റി പൊലീസ് കമീഷണർ ഭാസ്കർ റാവു എന്നിവർക്കാണ്​ പരാതി നൽകിയത്​. മുൻ മന്ത്രി സമീർ അഹമ്മദ് ഖാൻ, നസീർ അഹമ്മദ്, മുൻ കെ.പി.സി.സി സെക്രട്ടറി ടി.എം. ഷാഹിദ് തെക്കിൽ, ജി.എ. ബാവ, കോർപറേറ്റർ അൽതാഫ്, ഫാറൂഖ് തുടങ്ങിയവർ സംഘത്തിലുണ്ടായിരുന്നു.