കൂട്ടബലാത്സംഗ ശ്രമം വിഫലമായതിനെ തുടർന്ന്​ ഡിഗ്രി വിദ്യാർഥിനിയെ മണ്ണെണ്ണ ഒഴിച്ച്​ കത്തിച്ചു

ലഖ്​നോ: കൂട്ടബലാത്സംഗം ചെറുത്ത കോളജ്​ വിദ്യാർഥിനിയെ തീകൊളുത്തിയ ശേഷം ഹൈവേയിൽ ഉപേക്ഷിച്ചു. ഉത്തർപ്രദേശിലെ ഷാജഹാൻപൂർ ജില്ലയിലാണ്​ സംഭവം. ബി.എ രണ്ടാം വർഷ വിദ്യാർഥിനിയായ പെൺകുട്ടി ലഖ്​നോയിലെ സർക്കാർ ആശുപത്രിയിൽ ചികിത്സയിൽ കഴിയുകയാണ്​.

വിവസ്​ത്രയായ നിലയിൽ ദേഹമാസകലം പെള്ളലേറ്റ നിലയിൽ പെൺകുട്ടിയുടെ ശരീരം ബുധനാഴ്ചയാണ്​ പരിസരവാസികളിൽ ചിലർ ഹൈവേയിൽ വെച്ച്​ കണ്ടെത്തിയത്​. 72 ശതമാനത്തിലധികം പെള്ളലേറ്റ പെൺകു​ട്ടിയെ ഷാജഹാൻപൂരിലെ ജില്ല ആശുപത്രിയിൽ നിന്ന്​ ലഖ്​നോയിലേക്ക്​ മാറ്റുകയായിരുന്നു.

പെൺകുട്ടിയുടെ ആരോഗ്യ സ്​ഥിതിയിൽ നേരിയ പുരോഗതിയുണ്ടെന്ന്​ ശ്യാമപ്രസാദ്​ മുഖർജി സിവിൽ ഹോസ്​പിറ്റൽ ഡയരക്​ടർ ഡോ. എസ്​.സി. സൗന്ദ്രിയാൽ പറഞ്ഞു. പെൺകുട്ടിയുടെ പിതാവ്​ ജലാലാബാദ്​ പൊലീസ്​ സ്​റ്റേഷൻ പരിധിയിലുള്ള മൂന്ന്​ ആൺകുട്ടികൾക്കെതിരെ പരാതി നൽകി.

തിങ്കളാഴ്ച റായ്​ ഖേഡ ഗ്രാമത്തിൽ വെച്ച്​ പ്രതികൾ ബലാത്സംഗം ചെയ്യാൻ ശ്രമിക്കുകയായിരുന്നുവെന്നും ചെറുത്തുനിന്നതോടെ മണ്ണെണ്ണ ഒഴിച്ച്​ തീ കൊളുത്തുകയായിരുന്നുവെന്നും പെൺകുട്ടി അന്വേഷണ സംഘത്തിന്​​ മൊഴി നൽകി.

കോളജിലെയും മറ്റും സി.സി.ടി.വി കാമറ ദൃശ്യങ്ങൾ പരിശോധിച്ച്​ വരികയാണ്​. പെൺകുട്ടിയുടെ സഹപാഠികളെ ചോദ്യം ചെയ്​തു.

ലൈംഗിക പീഡനക്കേസിൽ അറസ്​റ്റിലായ മുൻ ബി.ജെ.പി നേതാവ്​ സ്വാമി ചിൻമയാനന്ദിന്‍റെ മുമുക്​ശു ആശ്രം ട്രസ്റ്റിന്‍റെ കീഴിൽ നടത്തി വരുന്ന സ്വാമി ശുക്​ദേവാനന്ദ്​ പോസ്റ്റ്​ ഗ്രാജുവേറ്റ്​ കോളജിലെ വിദ്യാർഥിനിക്കാണ്​ ദുരനുഭവമുണ്ടായത്​.