ബിഹാറിൽ ശക്​തി തെളിയിക്കാൻ റോഡ്​ ഷോയുമായി ചിരാഗ്​ പാസ്വാൻ

പട്​ന: വിമത നീക്കത്തെ തുടർന്ന്​ പ്രതിസന്ധിയിലായ ലോക് ജനശക്തി പാർട്ടിയിൽ, തൻെറ സ്വാധീനം തെളിയിക്കാൻ റോഡ്​ ഷോയുമായി ചിരാഗ്​ പാസ്വാൻ എം.പി. ജൂലൈയിൽ പിതാവ്​ രാംവിലാസ്​ പാസ്വാൻെറ ജന്മവാർഷികത്തോടനുബന്ധിച്ചാണ്​ റോഡ്​ ഷോ സംഘടിപ്പിക്കുന്നത്​.

കഴിഞ്ഞയാഴ്ച അമ്മാവൻ പശുപതി പരാസ്​ എം.പിയുടെ നേതൃത്വത്തിലാണ്​ പാർട്ടിയിൽ അട്ടിമറിയുണ്ടായത്​. എന്നാൽ, ബിഹാറിലെ വോട്ടുനിലയുടെ ആറ് ശതമാനം വരുന്ന പസ്വാൻ സമൂഹം ചിരാഗിനാണ്​ പിന്തുണ നൽകുന്നതെന്ന്​​ റിപ്പോർട്ടുകൾ സൂചിപ്പിക്കുന്നു​. ഇതിനെ ശക്​തിപ്പെടുത്താനാണ്​ റോഡ്​ ഷോ സംഘടിപ്പിക്കുന്നത്​. സമുദായം ചിരാഗിനൊപ്പമാണെന്ന്​ ലാലു പ്രസാദ്​ യാദവിൻെറ ആർ.ജെ.ഡിയടക്കം നിരീക്ഷിക്കുന്നുണ്ട്​.

വിമതനീക്കത്തിന്​ പിന്നാലെ ചിരാഗ്​ പാസ്വാൻ എം.പിയെ ലോക്​ ജനശക്​തി പാർട്ടി (എൽ.ജെ.പി) അധ്യക്ഷ സ്​ഥാനത്തുനിന്ന്​ നീക്കിയിരുന്നു. ഒരാൾ ഒരു പദവി എന്ന നയം പിന്തുടർന്നാണ്​ വിമത എം.പിമാർ ചിരാഗിനെ അധ്യക്ഷപദവിയിൽ നിന്നും നീക്കം ചെയ്​തത്​. ദേശീയ അധ്യക്ഷ പദവിക്ക്​ പുറമേ എൽ.ജെ.പി പാർലമെന്‍ററി പാർട്ടി നേതാവ്​, പാർലമെന്‍ററി ബോർഡ്​ ചെയർമാൻ സ്ഥാനങ്ങൾ ചിരാഗായിരുന്നു വഹിച്ചിരുന്നത്​.

വിമതരുടെ നേതാവും ചിരാഗിന്‍റെ പിതൃസഹോദരനും കൂടിയായ പശുപതി കുമാർ പരസായിരിക്കും പാർട്ടിയുടെ പുതിയ അധ്യക്ഷൻ. എന്നാൽ, തന്നെ പുറത്താക്കിയ എം.പിമാരെ പാർട്ടിയിൽനിന്ന്​ സസ്​പെൻഡ്​ ചെയ്​താണ്​ ചിരാഗ്​ ഇതിന്​ മറുപടി നൽകിയത്​.

കഴിഞ്ഞയാഴ്​ചയാണ്​ ചിരാഗ് പാസ്വാനെ തനിച്ചാക്കി ഒപ്പമുണ്ടായിരുന്ന അഞ്ച് എം.പിമാർ എതിർപക്ഷത്തേക്ക്​ നീങ്ങിയത്​. ലോക്​സഭയിൽ പ്രത്യേക ഗ്രൂപ്പായി പരിഗണിക്കാൻ അനുമതി തേടിയ വിമതർ, നേതാവായി ഹാജിപൂർ എം.പിയായ പശുപതി കുമാർ പരസിനെ തെരഞ്ഞെടുത്തിരുന്നു. ആകെ ആറ് എം.പിമാരാണ് പാർട്ടിക്കുള്ളത്. ഇതിൽ അഞ്ച് പേരും ചിരാഗിനെതിരെ നിലയുറപ്പിച്ചിരിക്കുകയാണ്. ഇവർ എൻ.ഡി.എയുടെ ഭാഗമായി പ്രവർത്തിക്കുമെന്നാണ്​ സൂചന.

മുൻ കേന്ദ്ര മന്ത്രി കൂടിയായ രാംവിലാസ് പാസ്വാന്‍റെ മരണ ശേഷമാണ് മകൻ ചിരാഗ് പാസ്വാൻ എൽ.ജെ.പി നേതൃസ്​ഥാനം ഏറ്റെടുത്തത്. ബിഹാർ നിയമസഭ തെരഞ്ഞെടുപ്പിൽ നിതീഷ് കുമാറിന്‍റെ ജെ.ഡി.യുവിന് പല മണ്ഡലങ്ങളിലും കനത്ത തിരിച്ചടി നൽകിയത് എൽ.ജെ.പിയാണ്. തെരഞ്ഞെടുപ്പിന് മുന്നോടിയായി എൻ.ഡി.എ സഖ്യം വിട്ട ചിരാഗ് സ്വന്തമായി സ്ഥാനാർഥികളെ നിർത്തുകയായിരുന്നു.