ശാഹീൻബാഗ്​, ജാമിഅ വെടിവെപ്പ്​: ഡൽഹി ഡെപ്യൂട്ടി കമീഷണറെ തെരഞ്ഞെടുപ്പ്​ കമീഷൻ മാറ്റി

ന്യൂഡൽഹി: ശാഹീൻബാഗ്​, ജാമിഅ വെടിവെപ്പ്​ സംഭവങ്ങളുടെ പശ്ചാത്തലത്തിൽ തെക്കുകിഴക്കൻ ഡൽഹിയുടെ ചുമതലയുള്ള ഡെപ്യ ൂട്ടി പൊലീസ്​ കമീഷണർ ചിന്മയ്​ ബിസ്വാളിലെ തെരഞ്ഞെടുപ്പ്​ കമീഷൻ മാറ്റി. അഡീഷനൽ ഡി.സി.പി കുമാർ ഗണേഷിനാണ്​ പകരം ചുമതല.

പൗരത്വ ഭേദഗതി നിയമത്തിനെതിരെ സമരം നടക്കുന്ന ശാഹീൻബാഗിലും ജാമിഅ മില്ലിയ്യ സർവകലാശാലയിലുമുണ്ടായ വെടിവെപ്പ്​ സംഭവങ്ങളുടെ പശ്ചാത്തലത്തിലാണ്​ മാറ്റം. ചിന്മയ്​ ബിസ്വാളിനോട്​ കേന്ദ്ര ആഭ്യന്തര മന്ത്രാലയത്തിൽ റിപ്പോർട്ട്​ ചെയ്യാനും കമീഷൻ നിർദേശിച്ചു.

പുതിയ ഡി.സി.പിയെ നിയമിക്കുന്നതിന്​ മൂന്നുപേരുടെ പട്ടിക അടിയന്തരമായി നൽകാൻ ഡൽഹി പൊലീസ്​ മേധാവിയോട്​ കമീഷൻ നിർദേശിച്ചു. സാഹചര്യം വിലയിരുത്തുന്നതിനായി ഡൽഹി മുഖ്യ തെരഞ്ഞെടുപ്പ്​ കമീഷണർ റൺബീർ സിങ്​ ഞായറാഴ്​ച രാവിലെ ശാഹീൻബാഗ്​ സന്ദർശിച്ചിരുന്നു.