മോദിയുടെ പ്രസംഗം നീക്കം ചെയ്​ത്​ ചൈനീസ്​ സാമൂഹിക മാധ്യമങ്ങൾ

ബെയ്​ജിങ്​: പ്രധാനമന്ത്രി ​നരേന്ദ്രമോദിയുടെ പ്രസംഗം ഉൾപ്പെടെ സാമൂഹിക മാധ്യമങ്ങളിൽനിന്ന്​ നീക്കം ചെയ്​ത്​ ചൈനീസ്​ സാമൂഹിക മാധ്യമങ്ങൾ. ഇന്ത്യ -ചൈന ഏറ്റുമുട്ടലിന്​ ശേഷം നടത്തിയ അപ്​ഡേറ്റുകളാണ്​ വിചാറ്റും സിനാ വെയബോയും നീക്കം ചെയ്​തതെന്ന്​ ചൈനയിലെ ഇന്ത്യൻ എംബസി അറിയിച്ചു.

ജൂൺ 18ന്​ പ്രധാനമന്ത്രി മുഖ്യമന്ത്രിമാരുമായി നടത്തിയ കൂടിക്കാഴ​്​ചയിലെ പ്രസംഗം, വിദേശകാര്യ വക്താവിൻെറ പ്രസ്​താവനകൾ തുടങ്ങിയവയാണ്​ വെയ്ബോ ഡിലീറ്റ്​ ചെയ്​തത്​.

ഇന്ത്യൻ വിദേശകാര്യ വക്താവ്​ അനുരാഗ്​ ശ്രീവാസ്​തവയുടെ പ്രതികരണവും എംബസിയുടെ സിനാ വെയ്​ബോ അക്കൗണ്ടിൽനിന്ന്​ ജൂൺ 18ന്​ നീക്കം ചെയ്​തതായി ഇന്ത്യൻ എംബസി അധികൃതർ അറിയിച്ചിരുന്നു. ഇതേ തുടർന്ന്​ ശ്രീവാസ്​തവയുടെ പ്രതികരണത്തിൻെറ സ്​ക്രീൻ ഷോട്ടുകൾ ജൂൺ 19ന്​ പോസ്​റ്റ്​ ചെയ്​തിരുന്നു.

രാജ്യ​ത്തിൻെറ രഹസ്യങ്ങൾ പരസ്യമാക്കുന്നു, ദേശസുരക്ഷക്ക്​ വിഘാതമാകുന്നു തുടങ്ങിയവ ചൂണ്ടിക്കാട്ടിയാണ്​ പോസ്​റ്റുകൾ നീക്കം ചെയ്​തിരിക്കുന്നത്​. ട്വിറ്ററിന്​​ സമാനമായ ചൈനീസ്​ ആപാണ്​ സിനാ വെയ്​ബോ. ലക്ഷകണക്കിന്​ ഉപഭോക്താക്കളുള്ള സിനാ വെയ്​ബോയിൽ നിരവധി ലോകനേതാക്കൾക്ക്​ അക്കൗണ്ടുണ്ട്​. ചൈനയിലെ ജനങ്ങളുമായി ആശയവിനിമയം നടത്തുന്നതിന്​ മോദിയും അക്കൗണ്ട്​ ആരംഭിച്ചിരുന്നു.

വെയ്​ബോക്ക്​ പുറമെ ഔദ്യോഗിക വിചാറ്റ്​ അക്കൗണ്ടിൽനിന്നും ഇന്ത്യൻ വിദേശകാര്യ വക്താവിൻെറ പ്രതികരണങ്ങൾ നീക്കം ചെയ്​തിട്ടുണ്ട്​. പ്രധാനമന്ത്രി നരേന്ദ്രമോദി നടത്തിയ പ്രതികരണവും വിചാറ്റിൽ ലഭ്യമല്ല. വിദേശകാര്യമന്ത്രാലയ വക്താവിൻെറ പ്രസ്താവന പങ്കുവെച്ച പോസ്റ്റില്‍ ക്ലിക്ക് ചെയ്യുമ്പോള്‍ നിയമങ്ങള്‍ പാലിക്കാത്തതിനാല്‍ ഇവ വീക്ഷിക്കാനാകില്ലെന്ന സന്ദേശമാണ്​ ലഭിക്കുന്നത്​.

രചയിതാവ് ഉള്ളടക്കം നീക്കം ചെയ്തുവെന്ന സന്ദേശമാണ്​ ലഭിക്കുന്നതെന്ന്​ ഇന്ത്യൻ എംബസി പറയുന്നു. എന്നാൽ തങ്ങൾ പോസ്​റ്റ്​ നീക്കം ചെയ്തിട്ടില്ലെന്നും അധികൃതർ വ്യക്തമാക്കി. ഇന്ത്യൻ എംബസിയുടെ വെയ്​ബോ പേജുകളിലും വിചാറ്റ്​ ഗ്രൂപ്പിലും ആയിരക്കണക്കിന്​ ഫോളോവേഴ്​സാണുള്ളത്​.