അംബാനിക്ക്​ വീണ്ടും തിരിച്ചടി; ഏഷ്യൻ കോടീശ്വര സ്​ഥാനവും നഷ്​ടമായി

ഇന്ത്യൻ കോടീശ്വരൻ മുകേഷ്​ അംബാനിക്ക്​ വീണ്ടും തിരിച്ചടി. കഴിഞ്ഞ ദിവസം ലോകത്തെ ആദ്യ 10 ശതകോടീശ്വരന്മാരുടെ ലിസ്റ്റിൽ നിന്ന്​ അംബാനി പുറത്തായിരുന്നു. ഇതിന്​ പിന്നാലെയാണ്​ ഏഷ്യൻ കോടീശ്വരന്മാരിൽ ഒന്നാമനെന്ന നേട്ടവും ഇപ്പോൾ കൈമോശം വന്നത്​. ചൈനയിലെ കുപ്പിവെള്ള വ്യവസായ ഭീമനായ ​േഴാങ്​ ഷൻഷാൻ ആണ്​ അംബാനിയെ പിന്തള്ളി ഒന്നാമതെത്തിയത്​. ജേണലിസം, കൂൺ കൃഷി, ആരോഗ്യ പരിരക്ഷ തുടങ്ങിയവയിൽ വ്യാപിച്ചുകിടക്കുന്ന വ്യവസായ സാമ്രാജ്യത്തിന്​ ഉടമയാണ്​ േഴാങ്​ ഷൻഷാൻ.

ചൈനീസ്​ ഓൺലൈൻ ഭീമനായ ആലിബാബയുടെ ഉടമ ജാക്ക്​ മായേയും ഷൻഷാൻ പിന്നിലാക്കിയിട്ടുണ്ട്​. ബ്ലൂംബെർഗ് ശതകോടീശ്വര പട്ടിക പ്രകാരം ഷൻഷാന്‍റെ മൊത്തം ആസ്തി ഈ വർഷം 70.9 ബില്യൺ ഡോളറിൽ നിന്ന്​ ഉയർന്ന് 77.8 ബില്യൺ ഡോളറിലെത്തി. ചരിത്രത്തിലെ തന്നെ ഏറ്റവും വേഗത്തിൽ വർധിച്ച സമ്പത്തായാണ്​ ഇത്​ കണക്കാക്കപ്പെടുന്നത്​. ചൈനയ്ക്ക് പുറത്ത് അത്രയൊന്നും അറിയപ്പെടാത്ത കോടീശ്വരനാണ്​ ഷൻഷാൻ. 66 കാരനായ അദ്ദേഹം രാഷ്ട്രീയത്തിലും ഇടപെട്ടിരുന്നില്ല. ചൈനയിൽ ലോൺ വൂൾഫ്​ അഥവാ ഏകാകിയായ ചെന്നായ എന്നാണ്​ ഷൻഷാൻ അറിയപ്പെടുന്നത്​. രണ്ട്​ ബിസിനസുകളിലുണ്ടായ വളർച്ചയാണ്​ ഷൻഷാന്‍റെ പെ​ട്ടെന്നുള്ള സമ്പത്ത്​ വർധനയ്​ക്ക്​ കാരണം.

വാക്സിൻ നിർമാതാക്കളായ ബീജിംഗ് വാണ്ടായ് ബയോളജിക്കൽ ഫാർമസി എന്‍റർപ്രൈസസിനെ ഏപ്രിലിലും കുപ്പിവെള്ള നിർമാതാക്കളായ നോങ്ഫു സ്പ്രിംഗ് കമ്പനിയെ മാസങ്ങൾക്ക്​ ശേഷവും ഷൻഷാൻ ഏറ്റെടുത്തിരുന്നു. ഹോങ്കോങ്ങിലെ ഏറ്റവും ആവശ്യക്കാരുള്ള കുപ്പിവെള്ള കമ്പനിയാണ് നോങ്‌ഫു​. നോങ്‌ഫുവിന്‍റെ ഓഹരികൾ 155% വളർച്ചയാണ്​ കുറഞ്ഞകാലത്തിനിടയ്​ക്ക്​ കൈവരിച്ചത്​. കോവിഡിന്‍റെ പശ്​ചാത്തലത്തിൽ വാക്​സിൻ കമ്പനിയുടെ ഓഹരി 2,000% വളർന്നിട്ടുണ്ട്​.

അംബാനിയുടെ വീഴ്ച

ലോകത്തിലെ അതിസമ്പന്നരുടെ പട്ടികയിൽ നാലാം സ്ഥാനം വരെ കൈയ്യടിക്കിയിരുന്ന അംബാനിയുടേത്​ പെ​ട്ടെന്നുള്ള വീഴ്​ച്ചയായിരുന്നു. ബ്ലൂംബർഗി​െൻറ സൂചിക പ്രകാരം 76.5 ബില്യണ്‍ ഡോളറാണ് (5.63 ലക്ഷം കോടി രൂപ) അംബാനിയുടെ നിലവിലെ ആസ്തി. മാസങ്ങൾക്ക്​ മുമ്പ്​ വരെ അത്​​ 90 ബില്യണ്‍ ഡോളറായിരുന്നു (6.62 ലക്ഷം കോടി രൂപ). ഇതോടെ ലോക കോടീശ്വര പട്ടികയില്‍ 11ാം സ്ഥാനത്തേക്ക് താഴ്​ന്നിരിക്കുകയാണ്​ അംബാനി. ഒറാക്കിള്‍ കോര്‍പ്പറേഷ​െൻറ സഹ-സ്ഥാപകന്‍ ലാറി എലിസണ്‍, ഗൂഗിളി​െൻറ സഹസ്ഥാപകന്‍ സെര്‍ജി ബ്രിന്‍ എന്നിവര്‍ക്ക് പിന്നിലായാണ്​ മുകേഷ് അബാനിയുടെ സ്ഥാനം.

അടുത്തകാലത്ത് റിലയന്‍സ് ഓഹരികളില്‍ സംഭവിച്ച വീഴ്ച്ചയാണ് ഇന്ത്യൻ വ്യവസായിക്ക്​ തിരിച്ചടിയായത്​. ഓഹരിയൊന്നിന് 2369.35 രൂപ എന്ന എക്കാലത്തേയും ഉയര്‍ന്ന നിലയില്‍ നിന്നും 16 ശതമാനം നഷ്ടത്തിലേക്കാണ്​ റിലയന്‍സി​െൻറ ഓഹരികള്‍ കൂപ്പുകുത്തിയത്​. വ്യാഴാഴ്ച്ച വ്യാപാരം അവസാനിച്ചപ്പോള്‍ 1992.95 രൂപയാണ് റിലയന്‍സി​െൻറ ഓഹരിയുടെ വില. മൊത്തം 186 ബില്യൺ ഡോളർ ആസ്തിയുള്ള ജെഫ് ബെസോസാണ്​ ലിസ്റ്റിൽ ഒന്നാമത്​​. 160 ബില്യൺ ഡോളറുമായി ഇലോൺ മസ്‌ക്, 131 ബില്യൺ ഡോളറുള്ള ബിൽ ഗേറ്റ്സ്, 110 ബില്യൺ ഡോളറുള്ള ബെർണാഡ് അർനോൾട്ട്, 101 ബില്യൺ ഡോളർ ആസ്തിയുള്ള മാർക്ക് സുകർബർഗുമാണ്​ പട്ടികയിൽ രണ്ട്​ മുതൽ അഞ്ചാം സ്ഥാനം വരെയുള്ളത്​.