മ്യാൻമറിലെ ചിൻ സംസ്​ഥാനത്തിലെ മുഖ്യമന്ത്രി മിസോറാമിൽ അഭയം തേടി

ഗുവാഹത്തി: പടിഞ്ഞാറൻ മ്യാൻമറിലെ ചിൻ സംസ്​ഥാനത്തെ മുഖ്യമന്ത്രി സലൈ ലിയാൻ ലിവായ്​ മിസോറാമിൽ അഭയം തേടി. മിസോറാം തലസ്​ഥാനമായ ​ഐസ്വാളിൽ നിന്ന്​ 185 കിലോമീറ്റർ അകലെയുള്ള അതിർത്തി നഗരമായ ചമ്പായി വഴി തിങ്കളാ​ഴ്ച രാത്രിയാണ്​ ലിവായ്​യും കൂട്ടരും അതിർത്തി കടന്ന്​ എത്തിയതെന്ന്​ ആഭ്യന്തര വകുപ്പ്​ വൃത്തങ്ങൾ പറഞ്ഞു.

മ്യാൻമറിലെ സൈനിക അട്ടിമറിയെ തുടർന്നാണ്​ 2016ൽ ചിൻ സംസ്​ഥാനത്തിന്‍റെ മുഖ്യമന്ത്രിയായി നിയമിതനായ ലുവായ്​ മിസോറാമിൽ അഭയം തേടിയെത്തിയത്​. മിസോറാമിന്‍റെ അഞ്ച്​ ജില്ലകളുമായി 510 കിലോമീറ്റർ അതിർത്തി പങ്കിടുന്ന മ്യാൻമർ സംസ്​ഥാനമാണ്​ ചിൻ. മണിപ്പുർ, ബംഗ്ലാദേശ്​ എന്നിവയായും ചിൻ അതിർത്തി പങ്കിടുന്നുണ്ട്​. ഫെബ്രുവരി മുതൽ ചിൻ സംസ്​ഥാനത്തുനിന്ന്​ 9.247 പേരാണ്​ മിസോറാമിൽ അഭയം തേടിയെത്തിയിരിക്കുന്നത്​.

സംസ്ഥാനത്ത് അഭയം തേടിയവരിൽ ലുവായ്​ ഉൾപ്പെടെ 25 നിയമസഭാംഗങ്ങളെങ്കിലും ഉണ്ടെന്നാണ്​ വിവരം. ചമ്പായ്​ ജില്ലയിൽ 3,856 പേരും ഐസ്വാളിൽ 1,633 പേരും ലോങ്‌റ്റ്‌ലായ്​ ജില്ലയിൽ 1,297 ​പേരും സിയാഹ ജില്ലയിൽ 633 പേരും ഹന്നാത്തിയൽ ജില്ലയിൽ 478 പേരും ലുങ്​ലീ ജില്ലയിൽ 167 പേരും സെർചിപ്പ്​ ജില്ലയിൽ 143 പേരും സെയ്​റ്റ്വൽ ജില്ലയിൽ112 പേരും കൊളാസിബ്​ ജില്ലയിൽ 36 പേരും ഖവ്​സ്വാൾ ജില്ലയിൽ28 പേരും ഉണ്ടെന്നാണ്​ മിസോറാം ആഭ്യന്തര വകുപ്പ്​ പുറത്തുവിട്ട കണക്ക്​. സംസ്​ഥാനത്ത്​ അഭയം പ്രാപിച്ച മ്യാൻമർ പൗരന്മാർക്ക്​ ആവശ്യമായ സൗകര്യങ്ങൾ ഒരുക്കുമെന്ന്​ മി​സോറാം മുഖ്യമന്ത്രി സോറാംതാങ്ക കഴിഞ്ഞദിവസം പ്രഖ്യാപിച്ചിരുന്നു.