അധോലോക കുറ്റവാളി ഛോട്ടാ രാജന്​ കോവിഡ്​; എയിംസിൽ ചികിത്സയിൽ

ന്യൂഡൽഹി: അധോലോക കുറ്റവാളി ഛോട്ടാ രാജനെന്ന രാജേന്ദ്ര നികാൽജെക്ക്​ കോവിഡ്​ സ്​ഥിരീകരിച്ചു. തിഹാർ ജയിൽ കഴിഞ്ഞിരുന്ന ഛോട്ടാ രാജന്​ രോഗം സ്​ഥിരീകരിച്ചതിനെ തുടർന്ന്​ ഡൽഹിയി​െല എയിംസിൽ പ്രവേശിപ്പിച്ചതായി ജയിൽ അധികൃതർ അറിയിച്ചു.

61കാരനായ ഛോട്ടാ രാജനെ കനത്ത സുരക്ഷ വലയത്തിലാണ്​ തിഹാർ ജയിലിൽ പാർപ്പിച്ചിരുന്നത്​. ഇന്തോനേഷ്യയിലെ ബാലിയിൽനിന്ന്​ 2015ൽ അറസ്റ്റിലായ ഛോട്ടാ രാജനെ തിഹാർ ജയിലിലേക്ക്​ കൊണ്ടുവരികയായിരുന്നു. ഛോട്ടാ രാജനെതിരായ​ എല്ലാ കേസുകളും സി.ബി.ഐക്ക്​ കൈമാറുകയും പ്രത്യേക കോടതി രൂപീകരിക്കുകയും ചെയ്​തിരുന്നു.

തിങ്കളാഴ്ച തിഹാർ ജയിലിലെ അസിസ്റ്റന്‍റ്​ ജയിലർ, ഛോട്ടാ രാജന്​ കോവിഡ്​ സ്​ഥിരീകരിച്ച വിവരം ​ഫോണിലൂടെ സെഷൻസ്​ കോടതിയെ അറിയിക്കുകയായിരുന്നു. രോഗം സ്​ഥിരീകരിച്ചതിനാൽ വിഡിയോ കോൺഫറൻസ്​ വഴി കോടതിയിൽ ഹാജരാക്കാൻ കഴിയില്ലെന്നും അദ്ദേഹം അറിയിച്ചു.

മുംബൈയിലെ നിരവധി കൊലപാതക കേസുകൾ ഉൾപ്പെടെ 70ഒാളം ക്രിമിനൽ കേസുകളിൽ പ്രതിയാണ്​ ഛോട്ടാ രാജൻ.