ഛത്തീസ്​ഗഢിൽ കരുത്തുകാട്ടി കോൺഗ്രസ്​; ജോഗിയുടെ കുത്തകസീറ്റ്​ പിടിച്ചത്​​ 38000വോട്ട്​ ലീഡോടെ

റായ്​പൂർ: കോൺഗ്രസിന്​ ഛത്തീസ്​ഗഢിൽ നിന്നും ശുഭവാർത്ത. മുൻമുഖ്യമന്ത്രി അജിത്​ ജോഗിയുടെ കുടുംബം 2001 മുതൽ കൈവശം വെച്ചുപോരുന്ന മർവാഹി സീറ്റ്​ 38,000ത്തിലധികം വോട്ടിൻെറ ഭൂരിപക്ഷത്തോടെ കോൺഗ്രസ്​ പിടിച്ചെടുക്കുകയായിരുന്നു.

എസ്​.ടി സംവരണ സീറ്റായ മർവാഹിയിൽ കോൺഗ്രസ്​ സ്ഥാനാർഥിയായി മത്സരിച്ചത്​ ​കെ.കെ ധ്രുവ്​ ആയിരുന്നു. ജനതാ കോൺഗ്രസ്​ നേതാവ്​ അജിത്​ ജോഗി അന്തരിച്ചതിനെത്തുടർന്നാണ്​ മർവാഹിയിലേക്ക്​ തെരഞ്ഞെടുപ്പ്​ നടന്നത്​. അജിത് ജോഗിയുടെ മകൻ അമിത്​ ജോഗിയും ഭാര്യ റിച്ച ജോഗിയും നോമിനേഷൻ നൽകിയിരുന്നെങ്കിലും ജാതി സർട്ടിഫിക്കറ്റ്​ ഇല്ലാത്ത കാരണത്താൽ പത്രിക തള്ളിയിരുന്നു. തുടർന്ന്​ ജനത കോൺഗ്രസ്​ ബി.ജെ.പിക്ക്​ പിന്തുണ പ്രഖ്യാപിച്ചെങ്കിലും കോൺഗ്രസ്​ തേരോട്ടം തടുക്കാനായില്ല.

കോൺഗ്രസ്​ സ്ഥാനാർഥി ​കെ.കെ ധ്രുവ്​ 83,561 വോട്ട്​ നേടിയപ്പോൾ ബി.ജെ.പിയുടെ ഗംഭീർ സിങ്ങിന്​ 45,364 വോട്ട്​ നേടാനേ ആയുള്ളൂ. ഛത്തീസ്​ഗഢ്​ മുഖ്യമന്ത്രി ഭൂപേഷ്​ ബാഗൽ നേരിട്ടാണ്​ തെരഞ്ഞെടുപ്പ്​ പ്രചാരണം നയിച്ചിരുന്നത്​. 18 വർഷത്തെ കബളിപ്പിക്കലിന്​ മർവാഹിയിലെ ജനങ്ങൾ പ്രതികരിച്ചുവെന്ന്​ ബാഗൽ ട്വിറ്ററിൽ കുറിച്ചു. 90 അംഗ നിയമസഭയിൽ 70 സീറ്റുകളും നിലവിൽ കോൺഗ്രസിനൊപ്പമാണ്​.