രാമക്ഷേത്ര നിര്‍മാണത്തിന്​ ലഭിച്ചത് 22 കോടി രൂപയുടെ വണ്ടിച്ചെക്കുകൾ

ന്യൂഡല്‍ഹി: അയോധ്യയിലെ രാമക്ഷേത്ര നിര്‍മാണത്തിനായി നടത്തിയ ധനസമാഹരണത്തില്‍ ലഭിച്ചത് 22 കോടി രൂപയുടെ വണ്ടിച്ചെക്കുകൾ​. ധനസമാഹരണത്തിന്​ നേതൃത്വം നൽകുന്ന വിശ്വഹിന്ദു പരിഷത്ത്​ അടക്കമുള്ള വിവിധ സംഘടനകൾക്ക്​ ക്ഷേത്ര നിമാണത്തിനായി ലഭിച്ചത്​ 15,000ത്തിലേറെ വണ്ടിച്ചെക്കുകളാണ്​.

രാമക്ഷേത്ര നിര്‍മാണത്തിനായി സർക്കാർ രൂപവത്കരിച്ച 'ശ്രീരാമ ജന്മഭൂമി തീര്‍ഥ ക്ഷേത്ര ട്രസ്റ്റ്' നടത്തിയ ഓഡിറ്റിലാണ് ഇക്കാര്യം വ്യക്തമായത്​. അക്കൗണ്ടില്‍ പണമില്ലാത്തത് മാത്രമല്ല, ഒപ്പുകളിലെ പൊരുത്തമില്ലായ്​മയും ഓവർ റൈറ്റിങും അടക്കമുള്ള സാങ്കേതി പിഴവുകളും ചെക്കുകള്‍ മടങ്ങാൻ കാരണമായിട്ടുണ്ടെന്ന്​ ബിസിനസ്​ ട​ുഡേ റ​ിപ്പോർട്ട്​ ചെയ്യുന്നു.

ബാങ്ക് അധികൃതരുമായി ചേര്‍ന്ന് ചെക്കുകളിലെ പിഴവുകള്‍ പരിഹരിക്കാന്‍ ശ്രമം നടത്തി വരികയാണെന്ന്​ ട്രസ്റ്റ് അംഗം ഡോ. അനില്‍ മിശ്ര പറഞ്ഞു. ചെക്കിലെ പിഴവുകള്‍ തിരുത്തുന്നതിന് വ്യക്തികള്‍ക്ക് ബാങ്കുകള്‍ അവസരം നല്‍കുമെന്നും അദ്ദേഹം ചൂണ്ടിക്കാട്ടി.

മടങ്ങിയ ചെക്കുകളില്‍ 2,000 എണ്ണം അയോധ്യയില്‍നിന്നുതന്നെ ലഭിച്ചവയാണെന്ന് ട്രസ്റ്റ്​ ട്രഷറർ ഗോവിന്ദ്​ ദേവ് ഗിരി പറഞ്ഞു. ബാക്കിയുള്ളവ രാജ്യത്തിന്‍റെ വിവിധ പ്രദേശങ്ങളില്‍നിന്ന് ലഭിച്ചവയാണ്. 'മടങ്ങിയ ചെക്കുകള്‍ അത്​ തന്നവര്‍ക്ക് തന്നെ തിരികെ നൽകാനാണ്​ തീരുമാനം. പിഴവുകള്‍ തിരുത്തി പുതിയ ചെക്ക്​ നൽകാൻ അവരോട്​ അഭ്യര്‍ഥിക്കും' -അദ്ദേഹം പറഞ്ഞു.

വി.എച്ച്​.പി അടക്കമുള്ള സംഘടനകൾ ജനുവരി 15 മുതല്‍ ഫെബ്രുവരി 17 വരെയാണ് ക്ഷേത്രനിര്‍മാണത്തിന് വേണ്ടി രാജ്യവ്യാപകമായി ധനസമാഹരണം നടത്തിയത്. ഇതുവരെ 2,500 കോടി രൂപ സമാഹരിച്ചതായാണ് റിപ്പോര്‍ട്ട്. എന്നാല്‍ എത്ര തുക സമാഹരിച്ചതെന്ന്​ സംബന്ധിച്ച വിവരങ്ങള്‍ ഔദ്യോഗികമായി ട്രസ്റ്റ്​ പുറത്തുവിട്ടിട്ടില്ല. 2024ൽ ക്ഷേത്ര നിർമാണം പൂർത്തിയാക്കുമെന്നാണ്​ വി.എച്ച്​.പി പ്രഖ്യാപിച്ചിരിക്കുന്നത്​.