കാലാവസ്ഥ പ്രവചനം മെച്ചപ്പെടുത്തണമെന്ന്​ ആവശ്യപ്പെട്ട്​ അമിത്​ ഷാക്ക്​ സ്റ്റാലിന്‍റെ കത്ത്​

ചെന്നൈ: കാലാവസ്ഥ പ്രവചനം മെച്ചപ്പെടുത്തണമെന്ന്​ ആവശ്യപ്പെട്ട്​ കേന്ദ്ര ആഭ്യന്തര മന്ത്രി അമിത്​ ഷാക്ക്​ തമിഴ്​നാട്​ മുഖ്യമന്ത്രി എം.കെ.സ്റ്റാലിന്‍റെ കത്ത്​. ഇന്ത്യൻ കാലാവസ്ഥ വകുപ്പിന്‍റെ പ്രവചനങ്ങളുടെ പോരായ്മ ചൂണ്ടിക്കാണിച്ചാണ്​ സ്റ്റാലിൻ കത്തയച്ചിരിക്കുന്നത്​.

കാലാവസ്ഥ പ്രവചനം കൃത്യതയുള്ളതാക്കി മാറ്റാൻ കൂടുതൽ നിക്ഷേപം നടത്തണമെന്നും സ്റ്റാലിൻ ആവശ്യപ്പെട്ടിട്ടുണ്ട്​. ഹൈ അലർട്ട്​ സാഹചര്യങ്ങൾ മുൻകൂട്ടി പ്രവചിക്കാനും അക്കാര്യങ്ങൾ സർക്കാറിനെ അറിയിക്കാനും ചെന്നൈയിലെ ഐ.എം.സിയെ പ്രാപ്തമാക്കണമെന്നും സ്റ്റാലിൻ ആവശ്യപ്പെട്ടിട്ടുണ്ട്​.

ദുരന്ത സാഹചര്യങ്ങളിൽ മുൻകരുതലെടുക്കാൻ ചെന്നൈ ഐ.എം.സിയുടെ മുന്നറിയിപ്പുകളാണ്​ ഉപയോഗപ്പെടുത്തിയിരുന്നത്​. എന്നാൽ, ആവശ്യമായ സമയം നൽകി റെഡ്​ അലർട്ട്​ സാഹചര്യങ്ങൾ മുൻകൂട്ടി പ്രവചിക്കാൻ ചെന്നൈ ഐ.എം.സി അപര്യാപ്തമാണെന്നാണ്​ മനസിലാക്കുന്നതെന്നും സ്റ്റാലിൻ കത്തിൽ പറയുന്നു. ഡിസംബർ 30-31 തീയതികളിൽ തമിഴ്​നാട്ടിൽ കനത്ത മഴയുണ്ടായതിന്‍റെ പശ്​ചാത്തലത്തിലാണ്​ സ്റ്റാലിൻ കത്തയച്ചിരിക്കുന്നത്​.